Oekusipost.com Dili – Primeiru-Ministru (PM), Taur Matan Ruak "lakohi" ona demisaun ba nia kargu liuhusi dada fali nia pedidu demisaun ho rajaun nasaun oras ne’e presija hela nia atu kontinua nia kargu nu’udar Primeiru-Ministru.
Hafoin Orsamentu Jeral Estadu (OJE) la liu iha Parlamentu Nasionál iha loron 17 Janeiru 2020, no iha fulan Fevereiru nia hato’o pedidu demisaun ba Prezidente Repúblika (PR), Francisco Guterres Lu Olo. Liu tiha ona loron 60 mós PR Lu Olo la foti desijaun kona-bá pedidu ne’e, no ikus mai PM Taur rasik mak dada fali nia pedidu ne’e ho rajaun situasaun hanesan oras ne’e presija lideransa ida atu fó prestasaun boot ba nasaun.
"Enkontru ohin ne’e Prezidente Repúblika husu atu ohin ami nain rua hasoru malu, ha’u mai ho asuntu rua de’it. Ida ha’u retira fila-fali ha’u nia aprezentasaun pedidu demisaun ba Prezidente Republika,” hatete PM Taur ba Jornalista sira iha Palásiu Prezidensial iha Ai-Tarak Laran, Dili Kuarta 8 Abril 2020.
“Tanba ha’u sente katak, iha momentu hanesan ne’e, nasaun presija ha’u hanesan Primeiru Ministru atu bele fó prestasaun bo’ot ba ita nia nasaun. Tanba ne’e ha’u retira fila-fali”.
No Pontu daruak nian mak, PM Taur informa ba PR kona-ba preparativu sira ne’ebé mak halo, atu bele minimiza efeitu virus corona iha rai-laran.
Nia hatutan, PR, Lu Olo rona ho atensaun ba assuntu ne’e, no apoiu nafatin atu kontinua knaar nu'udár Xefe governu hodi luta kombate COVID-19.
"Prezidente Repúblika Rona ho atensaun, kontinua fó apoiu nafatin ba Primeiru Ministru no ba governu. Nia husu ba ami atu halo esforsu másimu, atu minimiza efeitu virus corona iha ita nia rain, nune'e labele afeta ba ita nia sidadaun sira," esplika PM Taur.
Entretantun, antes ne’e iha loron Tersa, 24 Marsu 2020, Prezidente Partidu koaligasaun Aliansa Maioria Parlamentar (AMP) foun, Kay Rala Xanana Gusmão ezije ba Prezidente Repúblika (PR), Francisco Guterres Lu Olo tenke demite ona Primeiru-Ministru (PM), Taur Matan Ruak tanba lakon ona kompetensia hodi kontinua governa governu atual, maibé ezijensia ne’e la vale ona, tanba PM Taur rasik dada fali ona nia pedidu demisaun.
Prezidente partidu CNRT ne’e hatete, kompleta ona loron 60 no PR tenke demite ona PM hodi bele rezolve impase politika iha rai laran.
“Prezidente tenke demite ona Primeiru-Ministru, tanba kuandu orsamentu la liu iha Parlamentu Nasionál, liu loron 60 nia tenke foti desijaun ruma,” hatete Xanana liu husi konferensia ba imprensa iha sede partidu CNRT iha Bairu Grilos-Dili, Tersa 24 Marsu 2020.
