Oekusipost Dili – Parlamentu Nasionál (PN) aprova pedidu ho karáter urjénsia ba proposta levantamentu hodi fó autorizasaun ba Governu atu foti osan hamutuk millaun $250 hosi fundu petrolíferu.
Parlamentu Nasionál aprova pedidu ho karáter urjénsia ba proposta lei númeru 13/V(2a)-autorizasaun ba realizasaun transferénsia extraordinária ba fundu petrolíferu. Pedidu ho karáter urjénsia ne’e pasa ho votu afavór 64, laiha kontra no abstensaun.
“Ho nune’e autoriza pedidu ho karáter urjénsia, ami sei baixa kedas ba komisaun C (Finansa Públika),” hatete Prezidente Parlamentu Nasionál (PPN), Arão Noé de Jesus da Costa Amaral iha plenária, Kuarta 25 Marsu 2020.
Iha fatin hanesan, deputadu bankada Parlamentár Partidu Demokrátiku (PD), Mariano Assanami Sabino katak, pedidu ne’e mak importante liu hodi fó resposta ba kestaun inundasaun no kombate coronavirus Disease 2019 (CorVid-19) iha rai-laran.
“Ha’u hanoin pedidu ne’e iha nia fatin duni no tenke aprova iha Parlamentu Nasionál, tenke apoia ba levantamentu ba extraordinária hodi hahú implemeta,” deklara, Assanami iha plenária Parlamentu Nasionál.
Vise-Xefe bankada PLP, deputadu Francisco de Vasconselhos afirma, loloos ne’e pedidu urjénsia ba proposta alterasaun tenke pakote ho pedidu levantamentu ne’e.
“Millaun $250 ne’e la inklui ona prevensaun ba COVID-19 no inundasaun, tanba proposta alterasaun ne’e ita boot sira vota kontra tiha ona”, hateten Deputadu PLP.
Xefe Bankada Parlamentár PD, António da Conçeição, hateten pedidu extraordinária ne’e atu responde ba situasaun emerjénsia.
“Ne’e karáter ne’e urjénsia katak presiza osan iha oin duni. Ba ami importante tebes aprovasaun karáter urjénsia no aprova kedas lokraik ne’e. Ita buka mak ida ne’e atu la’o bá-oin”, dehan Deputadu António da Conçeição.
Entretantu, deputada FRETILIN, Maria Angélica Rangel, informa millaun $250 ne’e preve situasaun previstu sira, loloos ne’e proposta lei rua ne’e urjénsia.
“Sé ita la muda lei ita ko’alia buat sira-ne’e falsu hotu, tanba millaun $250 la sufisiente ba kestaun inundasaun no COVID-19”.
Deputada PLP, Maria Angelina Sarmento Lopes, pedidu levantamentu ho millaun $250 ne’e seidauk inklui asuntu kombate coronavirus no inundasaun.
“Ne’e hatudu katak Timor-Leste prontu simu coronavirus, agora ho millaun $250 ne’e la sufisiente, ha’u hanoin Governu laiha kondisaun, loloos ne’e fó kompeténsia jurídiku ba governu hodi foti osan boot liu hodi responde ba inundasaun no COVID-19”, hateten Deputada Maria Angelina.
Nia esplika, loloos ne’e pedidu levantamentu no alterasaun lei ne’e tenke la’o dala-ida tanba iha ligasaun maibé aprova de’it mak pedidu levantamentu entaun governu labele halo buat ida.
Deputadu KHUNTO, Luis Roberto, hateten pedidu levantamentu atu responde situasaun ne’ebé rai-laran.
“Ida-ne’e bankada KHUNTO prontu apoia 100%, KHUNTO sei a-favór no sei la kontra ba pedidu levantamentu”, dehan Deputadu Luis Roberto.
Deputada PD, Elvina Sousa, konsidera pedidu ne’e urjénsia no nesesáriu atu hetan aprovasaun hosi Parlamentu Nasionál.
“Ha’u sei apoia pedidu levantamentu extraordinária ne’e tanba ne’e nesesáriu atu fó resposta ba situasaun ne’ebé ita hasoru”, katak nia.
Deputadu Partidu Demokrátiku (PD), Adriano do Nascimento, konsidera pedidu levantamentu no proposta alterasaun ne’e importante hotu.
“Ba ha’u rua ne’e importante tebes ba estadu ida-ne’e, tanba estadu laiha Orsamentu Jerál Estadu, kualkér inisitiva hosi Governu hodi responde estadu nia problema ha’u a-favór. Ha’u-nia preokupasaun mak ne’e sera que ida-ne’e to’o enkuantu moras hada’et iha Timor laran, sera que ita sei mai atu debate tán. Ha’u hanesan reprezentante povu sei vota a-favór hodi governu rezolve problema,” esplika deputadu Adriano
“Sera que governu la hatene akontese inundasaun no akontese COVID-19 tanba ne’e akontese antes ona, ida-ne’e ha’u-nia sujestaun”, dehan nia.
Xefe Bankada Parlamentár UDT/FM, Francisco Xavier Carlos katak, importante liu mak pedidu levantamentu hodi responde situasaun hotu-hotu.
“Urjénsia ida agora ita ko’alia ne’e oinsá responde povu nia situasaun, tanba ne’e interese nasionál aas liu. Sekarik pedidu levantamentu lato’o, ita mak halo lei bele halo fila-fali”, katak nia.
