Oekusipost.com Dili – Bankada sira iha Parlamentu Nasionál hato’o sira nia poziasaun politika maioria konkorda ho pedidu Prezidente Repúblika (PR), Francisco Guterres Lu Olo ba Estadu emerjénsia, maibé deputada CNRT Carmelita Caetano Moniz katak pedidu ne’e tenke transforma tiha ba lei ida hodi to’o nia implementasaun ne’e labele viola fali sidadaun sira nia direitu báziku.
“Estadu emerjénsia tenke halo ba lei ida hodi autoridade sira bainhira implementa karik labele viola fali ema nia direitu báziku,” komenta deputada Carmelita liu husi nia intevensaun iha Plenaria Parlamentu Nasionál, Kinta 26 Marsu 2020.
Politika nain husi munisipiu Covalima ne’e sujere ba Estadu atu tenke elabora ho didi’ak kona-bá pedidu ne’e.
“Ita tenke regula mós loja sira ne’e, loke tuku hira no taka tuku hira ka taka total. Tenke koidadu ho ida ne’e se la’e depois implementasaun fulan ida ita nia povu la’ós mate, tanba virus corona, maibé tanba de’it hamlaha,” Carmelita argumenta.
Iha fatin hanesan deputadu PD, Mariano Asanami Sabino sujere antes atu impelementa Estadu emerjénsia ne’e, governu presija harii ekipa boot ida atu bele apoiu humanitariu ba sidadaun sira iha rai laran.
“Ita hatene katak ita nia povu maioria ne’e la’ós funsionariu públiku, maibé barak mak fa’an sasan iha Dili laran. Situasaun ne’e extraordinariu, entaun ita nia apoiu mós tenke extraordinariu,” esplika Asanami.
Prezidente Repúblika iha loron hirak liuba haruka ona pedidu emerjénsia ba Parlamentu Nasionál atu aprova hodi bele desidi Estadu emerjénsia nu’udar meiu ida atu prevene a’an husi moras virus corona ne’ebé durante ne’e hamate ona ema barak iha mundu.
Entretantu, Primeiru-Ministru, Taur Matan Ruak garante katak, implementasaun ne’e sei la viola sidadaun sira nia direitu báziku sira.
“Husu ba sidadaun sira mós atu labele la’o tun-sa’e. Karik iha presija importante mak bele la’o, se la importante bele tur hakmatek de’it iha uma,” PM Taur esplika.
Dadus Ministériu Saúde (MS) ne’ebé fó sai iha loron 25 Marsu 2020 rejista ema hamutuk nain 11 mak sai suspeitu ba moras Coronavirus Disease 2019 (CorVid-19), nain 10 negativu, no nain ida mak positivu.
