Oekusipost Dili – Maioria deputadu sira iha Parlamentu Nasionál (PN) blokeia ona Proposta Alterasaun Lei Orsamentu no Jestaun Finanseira ne’ebé hato’o husi governu ba parlamentu ho karáter urjensia ho votu kontra hamutuk 33 no afavór 31, nune’e pedidu urjensia ne’e la passa (xumba).
Pedidu urjensia governu nian ne’e kona-bá proposta Lei númeru 12/V (2a) alterasaun datoluk Lei númeru 13/2009 iha loron 21 Outubru kona-bá Orsamentu no Jestaun Finanseira. Proposta alterasaun ne’e ikus mai la passa iha PN, tanba maioria deputadu sira konsidera situasaun jeral iha rai-laran la’o di’ak hela.
Nune’e, Prezidente Parlamentu Nasionál, Arão Noe de Jesus da Costa katak sei hato’o pedidu ne’e ba fali Komisaun C ne’ebé responsavél ba Finansas Públika hodi halo debate ba proposta ne’e iha situasaun normal, la’ós situasaun emerjénsia.
“Proposta ne’e la liu, maibé ita sei baixa fali iha komisaun C,” hatete PPN Arão.
Antes ne’e, governu antes ne’e argumenta, haruka proposta ho karate urjensia ba PN atu bele loke dalan ba governu foti osan hodi bele rezolve problema sira iha rai laran.
Entretantu, molok PN blokeia pedidu urjensia ne'e mós, movimentu ema iha Dili laran mós hahu mihis no menus dadauk ona, no negosiante Xineza sira iha Dili laran taka ona sira nia atividade negósiu nu'udar responde ba prevensaun moras Coronavirus Disease 2019 (CorVid-19).
Primeiru-Ministru indizitadu Aliansa Maioria Parlamentar, Kay Rala Xanana Gusmão liu husi konferensia ba imprensa iha sede partidu CNRT iha Bairu Grilos-Dili, Tersa, 24 Marsu 2020 konsidera governu demisionariu laiha kompetensia legal hodi halo buat hotu.
