Oekusipost.com Dili – Ministru Obras Públiku (MOP), Salvador Eugénio Soares Dos Reis Pires husu ba públiku atu labele konfujaun ba subsidiu pulsa ahi eletrisidade ne’ebé la’o tiha ona.
Durante loron hirak nia laran, públiku sente konfujaun tebes ho kalkulasaun balun ba subsidiu pulsa ho valor osan $15 tenke hetan 150 kWh, maibé kalkulasaun ne’e sala, la loos ida. Ida loos mak hetan 125 kWh.
Ministru Salvador esplika, fó taxa fixa $15 ne’e sosa kréditu. Se konta ba kilowatt-hour (kWh), iha sistema tarefa ba kategória kliente doméstiku normalmente EDTL fa’an ho 0,12 centavos ba kada kWh. Nune’e, se sosa dolar ida de’it hetan 8.34 kWh.
“Se ita hola $15 entaun ita hetan 125 kWh. Ne’ebé labele konfundi entre $15 ho 125 kWh ne’e, tanba balun interpreta fali dehan $15 ne’e tenke hetan 150 kWh, ne’e la loos,” hatete Ministru iha nia serbisu fatin, Kaikoli-Dili, Tersa 7 Abril 2020.
Governante ne’e hatutan, ba fali kliente komersiante sira ne’ebé sira nia kontador rejista iha prepago, tanba normalmente kada kWh fa’an ho folin 0,24 centavos, entaun sira hetan de’it 62.5 Khw.
Mosu mós informasaun barak iha plataforma media sosial katak, subsidiu enerjia eletrisidade ne’ebé oras ne’e la’o hela, EDTL sei ko’a hikas bainhira tama fali ona ba situasaun normal, maibé ministru Salvador rejeitas kedas informasaun ne’e hodi dehan, "subsídiu" la’ós "kréditu" ka "deve ba EDTL".
“Kliente 160.555 ne'ebé hetan subsídiu pulsa eletrisidade $15 sei la selu fali ba EDTL,” nia esplika.
Nia fó rajaun, subsídiu la’ós finanseira ne’e ba kliente 160.555 atu hamenus movimentasaun kliente sira ba sosa pulsa, nu’udar mós dalan ida prevene moras virus corona (COVID-19) iha rai-laran.
