Oekusipost.com Dili – Koordenador Forsa Tarefa ba Prevensaun no Mitigasaun COVID-19, dotor Sergio Lobo hatete, kazu pozitivu oras ne’e sa’e ona ba nain 7 ne’ebé maioria Timoroan de’it.
Nia hatutan, ema hamutuk nain 569 mak oras ne’e sei hela iha kuarentena, iha Dili hamutuk nain 456, no iha munisipiu hamutuk ema nain 113. Suspeitu sira ne’ebé tuir ona teste hamutuk nain 210, nain 7 mak positivu kona moras virus corona (COVID-19) ne’ebé mak oras ne’e kontinua hala’o hela tratamentu intensivu iha sentru izolamentu iha sentru saúde Vera Cruz ho sira nia kondisaun mesak di’ak de’it.
Notisia relevante: Pasiente COVID-19 Nain 2 Lakohi Sai Husi Hotel-Katuas
Nia hatutan, kazu provavel hamutuk nain 6, no nain 3 sei hein rezultadu, ema nain 167 mak negativu.
“Ohin ne’e aumenta ba 8 kazu positivu, ida di’ak tiha ona no nain 7 mak oras ne’e iha izolamentu Vera Cruz,” hatete dotor Sergio liu husi konferensia imprensa ba jornalista sira iha Sentru Integradu ba Jestaun Krize iha Sentru Kovensaun Dili, Kuarta 15 Abril 2020.
Notisia relevante: COVID-19: Ambulansia Evakua Tan Pasiente 2 ba Vera Cruz
Iha loron Sesta, 10 Abril 2020, rezultadu teste laboratóriu hatudu Timoroan ida positivu infetadu moras virus corona (COVID-19), no tuir fali iha loron Segunda 13 Abril 2020, hatudu tan Timoroan nain 2 positivu, no iha loron Tersa, 14 Abril 2020 hatudu Timoroan nain 2 tan positivu. No Kuarta ohin 15 Abril 2020, rezultadu teste hatudu timoroan nain 2 tan positivu ona. Husi númeru hirak ne’e hatudu katak to’o oras ne’e Timoroan hamutuk nain 7 mak positivu ona kona-ba moras COVID-19 iha Timor-Leste. Sira nain 7 ne’e oras ne’e kontinua hetan tratamentu intensivu iha sentru izolamentu iha sentru saúde Vera Cruz.
