Oekusipost.com Dili – Ekipa ambulansia evakua tan ona pasiente moras virus corona (COVID-19) nain rua ba sentru izolamentu iha sentru saúde Vera Cruz hodi hetan tratamentu intensivu liu tan.
Observasaun Oe-Kusi Post iha fatin evakuasaun iha Hotel-Katuas katak, tuir loloos prosesu evakuasaun ne’e akontese ona iha oras tuku 11 dadersan, maibé tenke akontese fali iha oras 1:00 meudia, tanba mosu dezintendimentu entre ekipa ambulansia ho sidadaun kuarentena sira iha Hotel-Katuas.
Sidadaun karantina sira iha Hotel-Katuas oras ne’e lakohi ona atu hela iha hotel ne’e rasik, tanba sira mós konsidera katak hotel ne’e kategoria ba liña mean ona.
“Sira nain rua ne’e mak deskonfia positivu tenke hasai agora ba Vera Cruz, no sira seluk ba hotel seluk. Segundu, sira lakohi atu fó hasai teste ran. Se sira muda ba fatin kuarentena seluk, sira prontu ona atu koopera hodi hasai sira nia ran,” pessoal ambulante ne’e hatutan ezijensia sidadaun karantina Hotel-Katuas ba jornalista sira iha Hotel-Katuas, Dili Kuarta 15 Abril 2020.
Ho evakuasaun estudante nain rua ne’e, oras ne’e pasiente COVID-19 iha sentru izolamentu iha Vera Cruz iha posbilidade bele aumenta ona ba nain hitu (7), maibé informasaun kompletu sei fó sai husi Sentru Integradu ba Jestaun Krize.
