Oekusipost.com Dili – Pasiente moras virus corona (COVID-19) nain 2 ne'ebé deskonfia positivu ona iha Hotel-Katuas lakohi koopera ho ekipa ambulansia atu evakua sai sira ba iha fatin izolamentu iha Sentru Saúde Vera Cruz, Dili.
Tuir observasaun Oe-Kusi Post iha Hotel-Katuas, ekipa ambulansia to’o iha fatin ne’e iha horas tuku 11 dadersan. Hafoin para tiha kareta ambulansia iha portaun hotel ne’e, ekipa sira ne’e hakat tama ba hotel laran hodi evakua tan pasiente COVID-19 nain 2 tan atu lori ba tau fali iha sentru izolamentu iha Sentru Saúde Vera Cruz, maibé mosu demora itoan, tanba sidadaun karantina sira iha Hotel-Katuas ne’e nia laran lakohi koopera ba ekipa ambulansia hodi tula sai tiha pasiente nain 2 ne’e.
Ikus mai, prosesu evakua tenke demora kuaje oras balun nia laran, no ekipa ambulansia sira mós halo kedas kontaktu ba Sentru Integradu ba Jestaun Krize hodi hato’o situasaun ne’e.
Tanba mosu problema ne’e, pessoal ambulansia hato’o ezijensia sidadaun karantina sira katak, sira lakohi atu evakua sira ba fatin izolamentu.
“Ami mai iha Hotel-Katuas atu halo evakuasaun, sira iha pontu tolu. Primeiru, sira nain rua ne’e mak deskonfia positivu tenke hasai agora ba Vera Cruz, no sira seluk ba hotel seluk. Segundu, sira lakohi atu fó hasai teste ran. Se sira muda ba fatin karantina seluk, sira prontu ona atu koopera hodi hasai sira nia ran,” pessoal ambulante ne’e hatutan ezijensia sidadaun karantina Hotel-Katuas ba jornalista sira iha Hotel-katuas, Kuarta 15 Abril 2020.
Tuir informasaun balun ne’ebé Oe-Kusi Post asesu iha liña mean (front line) katak ohin Kuarta 15 Abril 2020 posibilidade iha Timoroan nain 2 tan mak deskonfia positivu, maibé informasaun klean sei fó sai husi Sentru Integradu ba Jestaun Krize.
