Oekusipost.com Dili – Bankada Partidu Libertasaun Popular (PLP) konsidera osan rihun atuas lima ($500,000) ne'ebé Parlamentu Nasionál aprova ona atu halo fiskalizasaun ba Corona Virus Disease (COVID-19) ne'e “viola” regra administrasaun, maibé parte balun konsidera montante osan ne’e la to’o pur sentu ida (0,3%) de’it kompara montante ba governu nian boot tebes (99.7%), tanba governu mak hetan $149,500,000.
Vice Xefe bankada PLP, Francisco do Vas Concelhos hateten, osan $500,000 ne'ebé parlamentu aprova ne'e “la tuir” regra adminiatrasaun Parlamentu Nasionál nian, tanba Prezidente Parlamentu Nasionál, Arão Noe aprezenta diretamente iha plenaria.
Nia haktuir, PLP bele dehan Parlamentu Nasionál hanoin de’it ba nia kabun, tanba tuir loloos osan ne’e la nesesariu, tanba politika atu kombate COVID-19 ne'e governu nia kompeténsia la'ós Parlamentu Nasionál no a’at liutan osan ne’e “la tuir” regra administrasaun Parlamentu nian.
Tuir nia katak, proposta sira ne'ebé atu dezenvolve atividade sira ne'e tenke liu husi komisaun depois mak lori ba iha konsellu administrasaun atu hare programa no aprova orsamentu. Bainhira aprova ona orsamentu mak bele lori ba iha komisaun C hodi halo relatóriu pareser hafoin mak lori ba plenaria, maibé osan ne'e aprezenta liu husi dalan ilegal.
"Foin lalais ne'e prezidente parlamentu lori osan 500 mil ne'e liu husi dalan tikus, ne'e ha'u konsidera liu husi dalan tikus tanba lori diretamente ba plenaria," dehan nia.
Entretantu, antes ne’e deputadu husi Partidu Demokrátiku (PD), António da Conceição (Kalohan) katak, husi osan $150,000,000 ne’e ba Estadu tomak, Parlamento hato’o proposta husu $500.000 aloka ba Parlamento Nasionál ho objetivu atu halo programa parseria ho UNDP dezenvolve material kampaña no sensibilizasaun kona-bá COVID-19 no fasilita desimina informasaun ba públiku kona-bá surtu COVID-19. Balun mak sai hela reklame ne’ebé deputado hotu ko’alia iha Teleizaun Timor-Leste (TVTL) no ba nesesidade seluk tan.
