AMBENO (TOP) – Antes ne’e iha membru governu nain tolu “hobur” tizora ida iha seremonia lansamentu projetu ida iha kapital Dili, maibé iha Rejiaun Administrativu Espesial Oe-Kusi Ambeno (RAEOA) akontese membru Sekretariu Rejional nain lima (5) kedas maka ba halo lansamentu fatuk dahuluk ba projetu konstrusaun kuarentena Covid-19 iha bairo Bitila, aldeia Manan, suku Beneufe, postu Nitibe, Oe-Kusi Ambeno.
Tuir informasaun ne’ebé The Oe-Kusi Post (TOP) asesu, seremónia lansamentu ne’e akontese iha loron nasionál ba memória, 7 Dezembru 2020, no partisipa husi adjuntu Prezidente Autoridade ba assuntu Sosial, Maximiano Neno, Sekretariu Rejional Saúde, Manuel da Costa, Sekretariu Rejional Administrasaun, Martinho Abani, Sekretariu Rejional Agrikultura, José Eta, no Sekretariu Rejional ba Komersiu no Industria, Lake Sombai Mnatu.
Seremónia ne’e la’os de’it halo lansamentu fatuk dahuluk ba kuarentena Covid-19, maibé inklui mó rezidensia ba pesoal saúde sira.
Diretor Obras Públika RAEOA, Candido Dos Reis Amaral, Jestor Sub-Rejiaun (administrador postu) Nitibe, Manuel Tolan, Xefe Sentru Saúde Baoknana, Jacinto Corbafo mós partisipa iha seremónia ne’e.
Entretantu, Gabinete Prezidente Autoridade reprezenta husi Marcos Seo ne’ebé antes ne’e hetan ezonerasaun husi Lugu iha loron 22 Abril 2020, tanba deskonfia hamosu desijaun tatidik malu ba fornesimentu hahan iha Ambeno.
Fatin kuarentena ida mós harii ona iha postu Sakato ho total kuartu 11.
