RAEOA Kontinua Ajuda Kbi’it La’ek Sira Iha Ambeno

Xefe Gabinete Prezidente Autoridade ba RAEOA, Agustinho Caet akompaña husi Xefe Suku Usitasae, Tomas Ulan Colo fó hela apoiu nesesidade báziku ba kbi’it la’ek ida iha suku Usaitassae. Foto Oe-Kusi Post/Abilio Elo Nini.

Oekusipopst.com Ambeno – Autoridade ba Rejiaun Administrativu Espesial Oe-Kusi Ambeno kontinua fó apoiu nesesidade báziku ba familia kbi’it la’ek sira iha suku 18 iha rai-ketan Ambeno.

Xefe Gabinete Prezidente Autoridade ba RAEOA, Agustinho Caet katak asaun ne’e foka ba rezidente sira iha área remota sira ne’ebé ladun iha asesu di’ak ba merkadu, tanba estrada la di’ak, no mós hela iha iha uma hodi kumpri regra Estadu emerjénsia nian.

Ekipa ne’e hala’o asaun ne’e komesa husi aldeia Nunu-Heno, suku Cunha, Sonaf-Mnasi, Kiub-Panaf, depois kontinua ba aldeia Buqui, suku Usitasae ne’ebé partense ba postu Oe-Silo ho total nain 30.

“Objetivu husi asaun sosial ne’e mak atu tulun kbi’it la’ek sira hodi sustenta sira nia moris iha situasaun Estadu emerjénsia ne’e,” hateten Caet ba Oe-Kusi Post iha Oe-Kusi Ambeno foin lalais. 

“Asaun ne’e ita nia Prezidente Autoridade mak orienta para fó apoiu ai-han ba ita nia inan-aman sira ne’ebé vulneral laiha ona forsa atu servis, no mós defisientes sira, sira ne’e persiza guvernu tau atensaun liu-liu iha tempu Estadu emerjénsia ne’e,” Caet afirma.

Xefe Suku Cunha, Domingos Seco Caunan ho Xefe Suku Usitasae, Tomas Ulan Colo agradese ba politika autoridade nian, no husu atu mantein asaun ne’e iha future.

“Ha’u reprezenta komunidade husi suku Cunha hakarak hato’o agradese ba autoridade RAEOA nia politika ida ne’e, tanba bele lori ai-han mai ajuda ha’u nia komunidade ne’ebé vulneral liu. Ha’u hanoin apoiu ne’e tuir duni politika governu nian tanba mai lahare ba kor politika, tanba ne’e ami husu se bele apoiu ida ne’e kontinua fali iha fulan mai tan liu-liu ba kbi’it la’ek sira,” agradese Xefe Suku Cunha. 

Abilio Elo Nini
Author: Abilio Elo NiniWebsite: www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Reporter
Reporter base in Ambeno, Oecusse.

PUBLISIDADE