BI-MELO (TOP) – Postu Saúde sira iha Rejiaun Administrativu Espesial Oe-Kusi Ambeno (RAEOA) kuaje fulan barak nia laran ona hasoru hela problema ai-moruk la iha hodi halo atendimentu no tratamentu ba pasiente sira, maibé serbisu saúde rejional to’o ohin loron seidauk fó rezultadu definitivu ruma kona-ba problema seriu ne’e.
Antes ne’e iha loron 29 Novembru 2022, Primeiru-Ministru, Taur Matan Ruak ho nia delegasaun lobuk ida ba hasoru Prezidente Autoridade ba Rejiaun Administrativu Espesial Oe-Kusi Ambeno, Arsenio Paixão Bano inagura ona armazen boot ida hotu tau ai-moruk ne’ebé lokaliza iha Santa Rosa, maibé tuir informasaun katak, armazen ne’ebé halo uja povu nia osan hamutuk U$ 427,651.95 husi kompañia Fitun Sanane Unipesoal Lda ne’e to’o ohin loron mamuk hela.
Informasaun balun ne’ebé The Oe-Kusi Post (TOP) asesu husi pesoal saúde balun iha edifisiu DHS Santa Rosa katak, kuaje postu saúde sira iha Bi-Melo, Oe-Silo, Pasabe, Nitibe, Pune no Pante Makassar rasik hasoru problema ai-moruk stock-out durante fulan barak nia laran ona, maibé to’o oras ne’e seidauk iha hanoin ruma husi parte autoridade atu oinsa bele rezolve lalais problema seriu ne’e, tanba se iha pasiente ruma ho moras kritiku ne’ebé presiza tebes ai-moruk hodi konsulta, maibé la iha, entaun pasiente ne’e bele mate.
“Ai-moruk la iha ne’e kuaze akontese iha sentru saúde hotu no postu saúde balun mós to’o agora ai-moruk la iha, dala ruma pasiente ba atu halo tratamentu, maibé doutor no infermeiru sira haruka sira fila de’it, tanba ai-moruk mak la iha duni,” hateten pessoal saúde ida ne’ebé husu ba The Oe-Kusi Post (TOP) atu labele públika nia identidade kompletu iha notisia ne’e, tanba tauk orsida bele hetan presaun no ezonerasaun husi Prezidente Autoridade RAEOA, Arsenio Paixão Bano no Sekretariu Rejional Saúde, Manuel da Costa.
Postu Saúde Bi-Melo ne’ebé lokaliza iha aldeia Bi-Hala, suku Bobokase, sub-rejiaun Pante Makassar durante fulan-4 ona laiha ai-moruk atu kura-matan, kulit no ai-moruk seluk tan.
Tuir infermeira Destakadu ba Postu Saúde Bi-Melo, Imelda Maria Corbafo de Souza katak, moras ne’ebé barak iha postu saúde ne’e mak moras matan no moras kulit nian, maibé nia labele halo atendimentu ka halo tratamentu ba pasiente sira ne’e, tanba durante fulan-4 ona ai-moruk ba moras sira ne’e laiha ida maske nia komunika bebeik ona ba serbisu saúde rejional nian.
“Pasiente ba moras matan no kulit durante barak mak mai atu halo tratamentu iha ne’e, maibé ami tenki haruka sira fila ba sosa ai-moruk iha (apotik), nune’e bele konsumu, tanba ai-moruk sira laiha kuaze fulan ha’at (4) ona,” hateten infermeira Imelda Maria Corbafo de Souza ba jornalista sira iha Postu Saúde Bi-Melo iha aldeia Bi-Hala, suku Bobokase, sub-rejiaun Pante Makassar, Kuarta 01 Fevereiru 2023.
Notisia relevante: Alkatiri ho kompania Árabe asina kontratu 3 dala ida de’it maibé, Clinica do Coração Ambeno la funsiona
Infermeira Imelda hatutan, molok akontese stock-out ba item ai-moruk hirak ne’e, nia hato’o ona pedidu akizasaun ba parte autoridade nian, maibé to’o ohin loron seidauk hetan resposta ruma.
“Ami fulan-fulan halo ona pedidu ba autoridade no sekretaria saúde, maibé seidauk responde ami nia problema ida ne’e to’o ohin loron,” infermeira Imelda afirma.
Nia mós seidauk hatene klaru kona-ba problema ai-moruk laiha ne’e akontese de’it iha ninia serbisu fatin ka akontese mós iha postu saúde hotu iha rai-ketan Oe-Kusi Ambeno.
“La hatene ai-moruk iha ostipal referal Oe-Kusi Ambeno mak la iha karik, ka halo nusa ne’e ami la hetene ida,” nia hateten.
Hatan ba problema ne’e, Sekretariu Rejiaun ba asuntu Saúde RAEOA, Manuel da Costa rekoñese ai-moruk iha postu saúde Bi-Melo la iha duni.
“Kona-ba ai-moruk RAEOA, asina MoU ho SAMES atu bele susporta ita ba ai-moruk, tanba ne’e ha’u rekoñese duni sentru saúde balun la iha ai-moruk item balun, entaun iha semana kotuk ha’u koordena ho SAMES, espera iha tempu badak ai-moruk bele to’o ona RAEOA,” hatan Manuel da Costa ba The Oe-Kusi Post (TOP) iha nia serbisu fatin iha Santa Rosa, Oe-Kusi Ambeno, Kuarta 01 Fevereiru 2023.
