Inan-feton, maun-alin Povu Atoni, Povu Rai-kiik, RAEOA,
Autoridade RAEOA, liliu Prezidente Autoridade, Companheiro de Luta Arsênio Bano nebe simu ha'u no ha'u nia ekipa ho maneira formal no emosionadu tebes. Maneira ezemplar duni.
Komunidade aldeia Oe-Bebo, Lela Ufe, ba imi nia ospitalidade hodi akomada ha'u sosial no kulturalmente iha imi nia fatin/knua.
Ha'u hahu ha'u nia kampanya prezidensial iha imi nia leet, iha Leuflua, Suco Taiboko, Sub-rejiaun Pante Makassar. Loron 1 marsu kalan, ha'u ho ekipa horik hamutuk ho populasaun aldeia Oe Bebu, Suco Lela Ufe, Sub-rejiaun Nítibe. Hahu kalan ne'e (1/3), kulturalmente ha'u membru familia Oe-Bebu, Lela-Ufe.
Iha Taiboko, ba populasaun sira nebe marka prezensa iha ha'u nia kampanya, ha'u dehan Oe-Cusse nudar Rai-Kiik nebe iha rai nasaun vizinu nia leet, tenki sai lalenok Timor-Leste nian. Sakato, Citrana, Naktuka, Nítibe, Oesilo, Pásabe, tenki refleta la'os de'it Timor-Leste nia furak, maibe leno Timor-Leste nia orgulhu no honra.
Loron 3 marsu, ho ekipa to'o iha Pune, Oesilo no hakat to'o mos Pásabe. Hanesan ba Lela Ufe, Nítibe, kondisaun estrada aat tebes. Iha Lela Ufe, rai-halai taka liuron, kareta liu ladiak.
Atu ba Pune, tenki bobar husi Oesilo, tanba liuron kotu.
Ko'alia ho komunidade sira iha kampanya "door to door" populasaun nia preokupasaun hanesan: liuron aat, sentru saúde la iha, no balun dook husi sira nia aldeia ka suco. Iha Pásabe sei iha edifisiu Eskola nebe didin ho au.
Kondisaun iha fatin sira ne'e sai nudar evidensia forte ba ha'u nia afirmasaun politika katak tinan 20 ona ita restaura independensia, maibe roman independensia ne'e seidauk leno kona ita nia povu. Tinan 20 ukun-na'in sira uza povu nia konfiansa politika nebe hetan hosi eleisaun atu serbi de'it sira nia interese politiku. La'os atu serbi povu.
Iha dalan fila hosi Pásabe, iha área Oe-lanas nian, haree ba mota-sorin, ema halo projetu loke auto-estrada. Ami nia motorista dehan "mota-sorin" ne'e ita nia vizinhu nia rain.
To'o hela-fatin, Colele-Sa'e, Cruz ha'u komunika ba Prezidente Autoridade (PA) RAEOA, ha'u nia Companheiro de Luta Arsenio Bano. Ha'u transmiti preokupasaun populasaun nian ne'e ba nia. PA Autoridade rekonhese ezistensia preokupasaun sira ne'e. Ba Companheiro Arsênio Bano ha'u dehan:
Nasionalista sira nia pekadu imperdoavel (dosa tak terampuni) mak halo nia povu rasik sente moe iha povu seluk nia oin.
Ha'u dehan ba nia, bainhira ha'u sai Prezidente Republika, ha'u sei la promulga Orsamentu Jeral Estadu bainhira RAEOA nian la inklui alokasaun atu hadi'a estrada, harii sentru saúde no eskola sira iha area rurais.
Informasaun nebe fo laran ksolok uitoan mai hosi ha'u nia Companheiro de Luta seluk, atoni oan, katak orsamentu atu loke dalan ba Citrana ho Oesilo ne'e iha hotu ona. Loloos ezekuta ona, maibe tanba pandemia COVID-19 mak to'o agora seidauk la'o.
Inan-feton no maun-alin sira,
Ha'u la iha biban atu ba to'o Sub-rejiaun seluk RAEOA nian atu fahe informasaun konaba ha'u nia kandidatura ba PR. Ha'u fiar katak Suco sira nebe ha'u vizita iha loron 3 nia laran ne'e reprezenta imi nia preokupasaun hotu.
Loron 19 marsu, loron importante ba imi atu hili imi nia Prezidente Republika foun. Imi hatene ona se mak prezidente foun ne'e. Nia la'os foun de'it, maibe tenki jerasaun foun. La'os de'it tenki jerasaun foun, maibe mos tenki aten-barani. Barani atu halo mudansa, barani halo Timor-Leste Ida Fraternu Liu. Vota ba ema nebe sei hamriik ho imi atu defende imi nia direitu. Vota ba prezidente nebe sei la husik imi sai mutun/vítima ba dezenvolvimentu.
Nudar Prezidente Repúblika ha'u enkoraja Autoridade RAEOA atu "promover um desenvolvimento harmonioso e integrado..." dezenvolvimentu nebe respeita populasaun sira nia direitu ba rai no uma.
Ha'u sura ho imi nia votu!
Vota ba numeru 12, Vota ba Unidade!
Vota Virgílio Guterres 'Lamukan', Vota ba Fraternidade!
Cruz, 04 marsu 2022
Virgílio Guterres 'Lamukan'
Kandidatu PR 2022-2027
