Juventude FRETILIN kontra Expo Dubai 2021

Juventude FRETILIN

Deklarasaun Polítika ba Partisipasaun Timor-Leste iha Expo Dubai 2020

Realidade moris Sosiál no Ekonómia ne’ebé mak nasaun Timor-Leste hasoru ho Krizé Saúde Públika halo ita prekoupa tebes no oinsa mak rezolve problema povu ni’an ho governu nia intervensaun, Ho Pandemia COVID-19 halo atividade Ekonómia monu no Negosiu kiik oan sira kontinua lakon rendimentu husi loron ba loron no traballador lubuk lakon serbisu tamba Empregador mós deside hapara sira nia kontratu no halo númeru dezempregu aumenta bebeik, problema hirak ne’e mosu durante iha ukun tinan 10 no ba’inhira CNRT hanesan Bancada Governu ni’an halo Xumba OJE 2020.

VIII Governu Konstitusionál ne’ebé Lidera husi Primeiru-Ministru Jeneral Taur Matan Ruak harii Komissaun ida hodi elabora Planu Rekuperasaun Ekonómika atu normaliza hikas ekonómia ne’ebé monu no halo problema sosiál mós hetok at liu tan. Iha Planu Rekuperasaun Ekonómika instrudus medidas importante lubuk maibé Governu la kosentra hodi atinze programa governu ne’ebé hetan aprovasaun iha Parlamentu Nasionál

Governu liu husi Minstériu Turizmu, Komérsiu no Industria halo Programa Expo Dubai 2020 maibé haluha tiha preparasaun rai laran ni’an hodi hasoru mudansa Polítika no Ekonómia iha nivel reziaun no mundu. Situasaun hirak ne’e mak halo Juventude FRETILIN prekoupa no husu intervensaun governu ni’an hodi hatan no foti nia pozisaun Polítika mak hanesan tuir mai ne’e;

  1. Juventude FRETILIN senti triste ho deklarasaun Primeiru-Ministru VIII Governu Konstitusionál, ba’inhira afirma Governu nia pozisaun ba Partisipasaun Timor-Leste ni’an iha Expo Dubai 2020 kontinua iha tempu pandemia COVID-19, maibé iha rai laran COVID-19 sai hanesan bareira.
  2. Juventude FRETILIN kontinua rejeita nafatin programa Expo Dubai iha post COVID-19 no husu Governu atu konsentra de’it ba Programa Governu no Planu Rekuperasaun Ekonómika hodi hatan problema sosiál no ekonómia ne’ebé povu Maubere hasoru hela no nune’e bele ajuda rezolve hikas ba’inhira ita tama ba era normal.
  3. Juventude FRETILIN konsidera Partisipasaun Timor-Leste ni’an iha Expo Dubai 2020 ne’e hanesan ba gasta de’it povu nia osan maibé povu barak mak sei ki’ak, mal nutrisaun aumenta, be mos laiha no seluk tan.
  1. Juventude FRETILIN mós konxiente katak ita presiza duni atu halo Relasaun Diplomatika ho nasaun hotu iha mundu, hanesan ita nia Konstituisaun Repúblika loke dalan ba ita maibé labele lori Expo Dubai 2020 hanesan programa Primadona.
  2. Husu mós ba Minstru Turizmu, Komérisiu no Industria Dr. José Lucas da Silva hanesan Prezidente Autoridade Nasionál Expo Dubai 2020 atu esplika didi’ak sá benefisiu mak Timor-Leste hakarak hetan husi Expo Dubai ba impaktu Ekonómia no Sosiál iha tempu badak no ba tempu naruk ni’an ho nia progresu no rezultadu.
  3. Husu mós Komissaun D Parlamentu Nasionál no Bancadas Parlamentares atu debate urigensia ho Ministru Koordenador Assuntu Ekonómiku S.E Eng. Joaquim Amaral no S.E Dr. Jose Lucas da Silva hanesan Ministru Turizmu Komérsiu Industria núdar mós Prezidente Autoridade Nasionál ba Expo Dubai iha tempu badak.
  4. Rejeita Expo Dubai 2020 no Juventude FRETILIN husu Governu hodi kria kampu serbisu ba jovem sira hodi reduz numeru dezempregu.
  5. Juventude FRETILIN kontinua fó konfiansa tomak ba Primeiru-Ministru VIII Governu Konstitusionál Jeneral Taur Matan Ruak maibé Juventude FRETILIN mós Rejeita nafatin Programa Expo Dubai 202o.

Sede Comité Centrál da FRETILIN, 14-Juñu-2021

REJEITA EXPO DUBAI 2020 Viva Juventude FRETILIN! Viva FRETILIN!
A LUTA CONTINUA! LUTAR PARA VENCER!

The Oekusi Post
Author: The Oekusi PostWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál. Rua. Numbei, Oe-Kusi Ambeno Mobile: +670 7723 4114 Email: info (at) OeKusiPost.com


PUBLISIDADE

Online Counter