HORTA (TOP) – Iha tinan 2010, governu liu husi Ministériu Agrikultura no Peska fahe trator boot hamutuk 21 ba iha Rejiaun Administrativu Espesial Oe-Kusi Ambeno (RAEOA) hodi aumenta produsaun agrikola iha rai ketan ne’e, maibé husi númeru ne’e trator hamutuk 12 mak funsiona, no 9 la di’ak ona. Nune’e, parte agrikultura planeia ona atu fa’an tiha ba komunidade sira hodi sosa fali trator foun.
"Trator agora eziste iha ne’e hamutuk 12 de’it, uluk iha 21 husi 2010 iha to’o agora 12 de’it maka halo operasaun, no ida a’at total,” diretur agrikultura RAEOA, Serilio dos Remedios Baba hateten ba The Oe-Kusi Post (TOP) iha nia serbisu fatin iha bari Horta, suku Costa, Oe-Kusi Ambeno, Sesta 11 Dezembru 2020.
“Ba sira a‘at ne’e ita la hadia ona, tanba nia kustu boot liu, ne’e ita nia autoridade planeia ona atu halo lelaun depois mak hola foun,” Serilio afirma.
Nia hatutan, tuir loloos trator 21 tenke fa’an hotu ona, tanba kondisaun maka la di’ak duni.
“Maibé, tanba ita halo jestaun di’ak entaun sei mantein 12, no munisipiu sira seluk durante ne’e mós simu tan trator foun ona, maibé Oe-Kusi Ambeno durante tinan 10 ona seidauk simu tan. Autoridade agora iha planu atu sosa tan trator foun,’ nia esplika.
Kona-ba programa fila rai, nia dehan kuaje atu remata ona, maibé sei iha suku 3 maka seidauk.
“Temporariamente progresu fila rai husi inisiu Novembru to’o ohin total 162 hekatres husi familia 326 husi suku Bobometo, Naimeko Lifau, Nipani, Bobokase, Kosta, Kuña, Lalisuk, Usiatasae, Suni-Ufe, no sei iha suku 3 maka sira nia dadus seidauk tama mai iha diresaun agrikultura,” nia esplika.
Nia dehan, programa fila rai ne’e, komunidade sira maka prepara kombustivel, no programa ida ne’e sei kontinua implementa to’o ohin loron.
Ema hamutuk 62.2% maka moris iha ki’ak nia okos, tuir rezultadu Living Standard Survey tinan 2014. No uma kain sira iha Ambeno atinje ona 80-100% mak involve iha produsaun agrikola, maibé komunidade sira nafatin hetan ameasa husi hamlaha, liliu iha tempu udan.
