Postu UPF Faotbasin nia kondisaun grave

FAOTBASIN (TOP) – Tuir dadus públiku ne’ebé The Oe-Kusi Post (TOP) asesu, membru Unidade Polisia Fronteira (UPF) iha Rejiaun Administrativu Espesial Oe-Kusi Ambeno (RAEOA) hamutuk nain 100, feto 3, mane nain 97 ne’ebé koloka ba postu sia (9) iha rai-ketan ne’e.

Husi postu 9 ne’e, rezidensia (hela fatin) ba membru UPF sira kuaje di’ak itoan kompara ho rezidensia ba membru UPF sira iha postu UPF Faotbasin iha aldeia Kiubiselo, suku Bobometo, sub-rejiaun Oe-Silo nia kondisaun grave tebes durante tinan barak ona seidauk hetan atensaun di’ak husi autoridade RAEOA no governu sentral liliu husi komandu jeral PNTL.

Xefe suku Bobomete, José Elo. Foto TOP/Abilio Elo Nini.

Xefe suku Bobomete, José Elo katak, kondisaun postu ne’e a’at kleur tebes ona, no sempre hetan vizita bebeik husi nai-ulun sira, maibé seidauk hadia to’o ohin lron.

“Postu UPF Faotbasin ne’e tinan barak ona nia kondisan la muda, la’os Faotbasin de’it, maibé inklui mós postu UPF Oe-Silo tuir ha’u nia observasaun postu rua ne’e nia kondisan la di’ak hotu,” hateten José Elo ba TOP iha sede suku Bobometo iha aldeia Tumin, Segunda 14 Dezembru 2020.

“Iha tempu udan, udan been tiru borus tama ba membru UPF sira nia hela fatin, tanba kalen sira mesak kuak hotu ona. Tanba ne’e maka ha’u sujere ba nai-ulun sira atu tau netik atensaun ba postu rua ne’e, tanba ita nia membru UPF sira mak loron-kalan asegura ita nia soberanu nasaun nian iha área fronteira,” nia afirma.

Iha fatin hanesan, Tenente Koronel F-FDTL, Bendito Dias Quintas nu’udar mós diretor ba Diresaun Formasaun no Ensinu ba ofisiais F-FDTL no PNTL durante loron hirak nia laran la’o haleu ona postu UPF sira iha Oe-Kusi Ambeno hodi hare no hatene klean liutan sira nia kondisaun.

“IDN nudar institutu ida, ami desloka mai halo levantamentu dadus atu oinsa aban bairua jere ita nia liña fronteira sira, tanba ne’e maka ami mai husi postu ba postu nia distansia ne’e hira, difikuildades saida maka sira enfrenta durante ne’e iha sira nia patrullamentu tuir misaun iha área fronteira,” nia esplika.

“Ami rekolla tiha dadus sira ne’e ami fila ba formula relatoriu ida ne’e atu enkamiña liu husi ami nia diretor hodi entrega ba defesa no seguransa no iha RAEOA ami sei husik hela relatoriu ida ba Prezidente autoridade atu konsidera no bele minimiza tiha difikuldade sira ne’e iha liña fronteira,” nia afirma.

Hatan ba problema ne’e, Prezidente Autoridade ba RAEOA, Arsenio Paixão Bano promete ona sei hadia postu sira ne’e iha tinan oin, 2021.

“Postu UPF Faotbasin nian, ne’e vizita dala hira ona husi ema boot hotu inklui Ministru Defeza uluk, ha’u mós ba vizita ona ne’e kestaun koordenasaun de’it. Autoridade prontu atu hare situasaun ida ne’e, koordenasaun la’o dadauk, no ha’u hanoin tinan oin ita sei halo,” Bano promete.

Abilio Elo Nini
Author: Abilio Elo NiniWebsite: www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Reporter
Reporter base in Ambeno, Oecusse.

PUBLISIDADE

Online Counter