“Indisiplinadu”, SAMHEE Construction hapara Ambeno oan nain 11

SANTA ROSA – Kompañia internasional SAMHEE Construction Co.Ltd aprezenta ona rajaun hapara tiha traballador Oe-Kusi Ambeno oan nain 11, tanba “indisipliadu”, maibé karta terminasaun kontratu ne’ebé The Oe-Kusi Post (TOP) asesu katak, tanba volume serbisu mak hahu menus ona.

Maske kompañia ne’e aprezenta ona rajaun rua ne’ebé soke malu, tanba la hanesan, maibé tuir traballador ida deklara ba TOP katak, sira simu karta hapara serbisu ne’e ho derepente de’it ho rajaun kompañia nia osan mak laiha ona.

Karta hapara kontratu ne’ebé fó sai iha loron Sábadu 18 Jullu 2020, no konteudu husi karta ne’e la temin kona-bá traballador sira serbisu la kumpre regras ka indisiplinadu, maibé konteudu karta ne’e hatete katak;

Husi parte jestaun kompañia nian foti ona desizaun katak sei hapara ou termina serbisu ho ita boot. Ho razaun, agora dadaun serbisu menus no kompañia presija hamenus traballador.

Kompañia agradese tebes ba ita boot nia kooperasaun ne’e ba obra ka projetu ida ne’e. Ho nune’e, kompañia sei halo pagamentu ba saláriu fulan Jullu nian no mós ho indemnizasaun (PHK) tuir kontratu lei traballu nian.

Karta terminasaun serbisu ba traballador sira ne’e asinatura husi Site manager SAMHEE Contruction Co.Ltd, Youngwon Yoo.

 

Nune’e, iha loron Kuarta 22 Jullu 2020, jornalista TOP hakata ba edifisiu kompañia ne’e iha Oe-Kusi Ambeno hodi kontinua husu rajaun saida mak tenke hapara traballador sira, maibé Site manager SAMHEE Contruction Co.Ltd, Youngwon Yoo ne’ebé asina karta terminasaun serbisu ne’e lakohi fó intervista, no delega de’it nia staff nain-rua mak fó rajaun traballador nain 11 ne’e serbisu la kumpre regras, maibé karta ne’ebé fó ba traballador sira la hatete klaru.

Staff nain-rua ne’ebé reprezenta Youngwon Yoo esplika katak, husi traballador nain 11 ne’e, iha nain 7 antes ne’e hetan ona karta xamada atensaun liu dala 3 ona, no nain 4 mak empreza kontrata serbisu ba fulan 3, maibé la hatudu prestasaun serbisu di’ak ka la hatudu progresu iha serbisu laran mak empreza hola dezisaun termina sira nia serbisu.

Entretantu, tuir traballador ida ne’ebé hapara ona husi serbisu ne’e deklara, la konkorda ho desijaun kompañia nian, tanba fó karta hapara serbisu ho derepente de’it.

“Ami ka’er hela serbisu iha obra ne’e, derepente de’it haruka ema ida naran Hilario bolu ami dehan labele serbisu ona, imi atu sai ona, to’o ne’eba sira entrega karta sira ne’e,” hateten traballador id aba The Oe-Kusi Post iha Oe-Kusi Ambeno, Sábadu 18 Jullu 2020.

Kontratu dahuluk ba projetu ne’e tenke remata ona iha tinan 2018, maibé to’o oras ne’e sedauk hotu hela deit. Projetu ne’e hahu iha loron 1 Fevereiru 2017 ho valor kontratu US$ 10,900,033,37 ba durasaun fulan 18 nian, maibé nia durasaun ne’e liu tiha ona. 

Abilio Elo Nini
Author: Abilio Elo NiniWebsite: www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Reporter
Reporter base in Ambeno, Oecusse.

PUBLISIDADE

Online Counter