“Indisiplinadu no lahatene regra”, Juíz duni sai partisipante nain 2

SANTA ROSA (TOP) – Juíz administrador ba Tribunal Oe-Kusi Ambeno, Hugo da Crus Pui tenke duni sai tiha partisipante nain 2 durante audiensia julgamentu ba kazu agresaun fiziku ida, tanba partisipante sira ne’e “indisiplinadu no lahatene regra” sira bainhira tama partisipa audiensia julgamentu ruma iha Tribunal laran.

Molok hahu julgamentu, juíz fó sai ona regulamentu sira hanesan hamate telemovel, labele halo diskusaun, no labele hakilar iha sala julgamnentu ne’e, maibé partisipante nain 4 ne’e kontinua hatudu sira nia ignorante hodi la hakruk ba regulamentu ne’e rasik, nune’e juíz tenke duni sira sai husi sala julgamentu nian, maibé nain 2 de’it mak sai, no nain rua seluk tuur hakmatek de’it iha sala julgamentu laran. Partisipante nain 2 ne’ebé sai husi sala julgamentu mak Nilton Rodrigues Pereira, no Blasco Nesi.

Partisipante sira iha julgamentu kazu agresaun fiziku hasoru mestre Domingos Nesi iha Tribunal Oe-Kusi Ambeno, Tersa 7 Jullu 2020. Foto The Oe-Kusi Post/Abilio Elo Nini.  

The Oe-Kusi Post (TOP) observa direita iha sala audiensia julgamentu ne’e, juíz duni uluk partisipante ida naran Nilton Rodrigues Pereira tanba ko’alia bisu-bisu iha sala laran hodi defende arguidu APB, maibé juíz konsege hetan hodi hakalma situasaun ne’e iha momentu julgamnetu la’o hela.

"O sai tiha, faru metan ne’eba, o ko’alia saida, iha ne'e la’os fatin diskusaun. O sai tiha faru metan ne’eba rona ka la’e?," Juíz Hugo da Cruz Pui lian maka’as duni sai partisipante ne’e bainhira julgamentu la’o hela iha Tribunal Distrital Oe-Kusi Ambeno, Tersa 7 Jullu 2020.

Liu tiha ida ne’e, juíz duni tan partisipante ida naran José António Afoan, tanba hatudu nia indisiplinadu bainhira tama tuur iha sala julgamentu laran.

"Huts... hasai tiha oklu ne’e, fatin ne’e la’os área branca, la’os fatin hotel, la’os merkadu para o mai pamer o nia jeitu ho oklu metan ne’e. Ne’e Tribunal fatin julgamentu. Se o la tuir regras sei hetan mandadu detensaun hodi ba kumpre oras 72 iha sela polisia. Ne’e peraturan, la’os fatin nar-naran," esplika juíz ho lian maka’as.

Maske duni sai ona partisipante nain-rua ne’e, maibé sei nafatin iha partisipante ida tan naran Marcos Seo nu’udar eis diretór rejional saúde RAEOA, tanba nia pozisaun tuur ne’e hasa’e (tula) nia ain bainhira prosesu julgamentu la’o hela.

"Hatun tiha ain ne’e senhor, ne’e fatin Tribunal la’os iha liur mak o mai tuur halo modelu oi-oin, la kumpre sai husi ne’e, rona ka la’e?," esplika juíz.

Entretantu, duni ba dala ikus nian mak partisipante ida naran Blasco Nesi bainhira ko’alia bisu-bisu hodi defende lezadu Domingos Nesi durante julgamentu la’o hela.

"Ita boot faru mutin ne’eba sai, lalais sai. Lezadu hato’o nia deklarasaun iha ne’e, la’os ami atu rona fali ita boot, tenke sai ba ona," hateten juíz.

Abilio Elo Nini
Author: Abilio Elo NiniWebsite: www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Reporter
Reporter base in Ambeno, Oecusse.

PUBLISIDADE

Online Counter