AMBENO (TOP) – Kamarada Arsenio Paixão Bano atual Prezidente Autoridade ba Rejiaun Administrativu Espesial Oe-Kusi Ambeno (RAEOA) ‘hatene uluk ona’, molok ekipa Polisia Nasionál Serbisu Investigasaun Kriminal (PNSIK) ezekuta mandadu Tribunal Distrital Dili nian hodi ba ka’er kompañeiru Agustinho Caet iha Oe-Kusi Ambeno.
Tuir fonte kredivel ida husi gabinete Prezidente Autoridade RAEOA, Bano hatene ona loron rua nia laran, molok PNSIK ba ezekuta mandadu Tribunal nian.
Fonte ne’e konta, molok PNSIK halo buska, aprensaun no kapturasaun ba Agustinho Caet ne’ebé durante ne’e mós ativu tebes hodi halo konsolidasaun ba estrutura partidu CNRT nian iha Oe-Kusi Ambeno, Bano konvida uluk nia maluk ida husi munisipiu Kovalima, maibé hela kleur iha Oe-Kusi Ambeno ba iha nia rezidensia Fulolo hodi halo diskusaun badak ida kona-ba mandadu Tribunal ne’e.
Maibé, bainhira TOP esforsu konfirma assuntu ne'e ba Arsenio Paixão Bano via kontaktu telemovél, nia la atende.
Prosesu buska, aprensaun no kapturasaun ba Agustinho Caet ne’e lori ksolok uain tebes ba simpatizante no militante FRETILIN sira iha Oe-Kusi Ambeno basa bele hases nia itoan husi rai-ketan ne’e hodi fó fatin ba atividade partidu sira seluk, liliu FRETILIN iha rai-ki’ik bele halo movimentu livre itoan.
Ekipa PNSIK polisia investigasaun kriminal kuaje nain 6 tama ba área hotel ne’ebé Agustinho Caet hela ba iha oras tuku 10 dadersan, no kontinua tama ba nia kuartu laran hodi sita tiha nia lap top ida ho nia telemovél sira.
TOP observa katak, durante ne’e Agustinho Caet maka sempre akompaña vitima detensaun illegal no vitima visum obrigatoriu ba labarik feto sira ho idade menor besik nain 30 husi uma mahon Topu-Honis durante prosesu julgamentu la’o iha Tribunal Oe-Kusi Ambeno.
Caet antes ne’e mós ativu tebes hodi publika informasaun barak kona-ba kazu Topu-Honis iha nia konta media sosial Facebook ne’ebé hamosu diskusaun pro-kontra kona-ba kazu pedofilia ne’ebé deskonfia akontese iha uma mahon Topu-Honis.
Ho diskusaun sira iha plata forma media sosial, ikus mai autoridade judisiariu sira konsidera diskusaun sira ne’e dehan viola segredu justisa ne’ebé previstu iha lei artigu 291 husi Kódigu Prosesu Penal Timor-Leste.
Entretantu, Bano ho nia familia lubuk ida durante ne’e ativu tebes hodi halo kampaña kontra kazu pedofilia ne’ebé deskonfia akontese iha uma mahon Topu-Honis iha Oe-Kusi Ambeno, maibé nonok loos de'it ba labarik feto besik nain 30 ne'ebé sai vitima ba detensaun ilegal no vitima ba prátika teste virjinidade (visum) ho forsadamente iha uma mahon Pradet Oe-Kusi Ambeno iha fulan Juñu 2020. Husi prátika teste virjinidade ne'e ikus mai labarik feto ida tenke mate hafoin hetan visum obrigatoriu ne'e. Febriana Bana mate hafoin hetan visum obrigatoriu iha Oe-Kusi Ambeno.
