Polisia ka’er tiha ona Agustinho Caet iha Ambeno

AMBENO (TOP) – Ekipa Polisia Nasionál Timor-Leste (PNTL) ejekuta ona mandadu buska no aprensaun ba Agustinho Caet ligadu ba kazu Topu-Honis iha Oe-Kusi Ambeno.

Tuir informasaun balun ne’ebé The Oe-Kusi Post (TOP) asesu iha Hotel Gratidão ne’ebé lokaliza iha Oe-Bau, Oe-Kusi Ambeno, ekipa polisia investigasaun kriminal kuaje nain 6 tama ba área hotel ne’e iha oras tuku 10 dadersan, no kontinua tam aba Agustinho Caet nia kuartu laran hodi sita tiha nia lap top Acer ida ho nia telemovél ida.

“Polisia mai iha dadersan de’it, sira mai direitamente tama ba maun Agustinho nia kuartu laran, foti tiha nia sasan balun hanesan nia lap top no telemovel depois tau aljema iha nia liman. Agora sira sai tiha ona husi fatin ne’e, no ami lahatene polisia sira lori nia ba ne’ebé karik,” hateten sasin ida ba TOP iha Oe-Bau, Oe-Kusi Ambeno, Kuarta 18 Agustu 2021.

TOP observa katak, durante ne’e Agustinho Caet maka sempre akompaña vitima detensaun illegal no vitima visum obrigatoriu ba labarik feto sira ho idade menor besik nain 30 husi uma mahon Topu-Honis durante prosesu julgamentu la’o iha Tribunal Oe-Kusi Ambeno.

Caet antes ne’e mós ativu tebes hodi publika informasaun barak kona-ba kazu Topu-Honis iha nia konta media sosial Facebook ne’ebé hamosu diskusaun pro-kontra kona-ba kazu pedofilia ne’ebé deskonfia akontese iha uma mahon Topu-Honis.

Tuir informasaun ne’ebé TOP asesu katak, ekipa polisia investigasaun kriminal ne’e sei transporta Caet husi Oe-Kusi Ambeno ba Dili hodi tuir prosesu inkeritu iha kuartel jeral PNTL iha Kaikoli, Dili iha oras tuku 2 lorokraik.

 

 

 

 

  

 

João Caunan
Author: João CaunanWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Jornalista
Jornalista The Oekusi Post iha Ambeno, Oekusi, RAEOA. Bandu atu hetan envelope ka sasan ruma husi fontes informasaun sira.

PUBLISIDADE

Online Counter