DILI (TOP) — Repúblika Demokrátika Timor-Leste (RDTL) ho Repúblika Indonézia (RI) hahu ona halo diskusaun ba zona ekonomia livre entre rai-rua.
Primeiru-Ministru, Kay Rala Xanana Gusmão hala’o enkontru ho Embaixador Repúblika Indonézia ba Timor-Leste, Okto Dorinus Manik hodi diskute kona-ba implementasaun zona ekonomia livre iha fronteira ne’ebé sei iha prosesu preparasaun entre ekipa tekniku nasaun rua nian.
Akordu kooperasaun ne’e rai-rua halo hodi ajuda dezenvolve ekonomia povu rai-rua sira iha liña fronteira terrestre.
“Ami diskute mós kona-ba zona ekonomia fronteira ida ne’e sei implementa lalais husi ekipa Indonézia no mós Timor-Leste sei hala’o hela preparasaun. Ekipa rua ne’e mós sei hasoru malu hodi diskute konseitu ne’ebé iha konkordansia ba malu,” Embaixador RI ba RDTL, Okto Dorinus hateten ba jornalista sira hafoin hala’o enkontru ho Primeiru-Ministru Xanana iha Palasiu Governu, Dili, Segunda, 14 Agostu 2023.
Embaixador Manik hatutan, governu Indonézia nia parte prontu serbisu hamutuk ho IX Governu Konstitisionál ho membru governu na’in 46.
“Ohin mai hasoru Primeiru -Ministru Xanana hodi aproveita kumprimenta, no ami diskute kona-ba preparasaun serbisu hamutuk entre Timor-Leste no Indonésia hodi kontinua diskute kooperasaun bilaterál ho governu foun ne’e,” nia hateten.
Diplomata Indonézia ne’e dehan, ekipa tékniku Indonézia no Timor-Leste mós sei kontinua diskute atu hakotu fronteira terrestre rai-rua iha tinan 2023 nia laran.
Antes ne’e, Prezidente RDTL, José Ramos-Horta hala’o vizita serbisu ba Indonézia iha fulan Jullu 2022 hasoru malu ho Prezidente Repúblika Indonézia, Joko Widodo hodi asina ona akordu kooperasaun zona ekonomia livre entre fronteira rua, no eis Primeiru-Ministru Taur Matan Ruak halo ona vizita mós ba Indonézia diskute kooperasaun serbisu implementa zona ekonomia livre.
