DILI (TOP) – Governu liu husi reuniaun Konsellu Ministru sira aprova ona orsamentu retifikativu lubuk ida hodi ezekuta de’it iha fulan ne’e nia laran to’o Dezembru.
Antes ne’e, Primeiru-Ministru, Kay Rala Xanana Gusmão hateten, Orsamentu Retifikativu (OR) governu anteriór nian ba tinan 2023 hamutuk biliaun $2-resin, ne’ebé agora atu haree husi fulan-juñu to’o dezembru 2023.
Hafoin ida ne’e, Xefe Governu ne’e kontinua lidera membru governu sira kuaje semana ida resin iha Ministériu Finansas halo debate no preparasaun kona-ba orsamentu retifikativu ne’e rasik.
Maske lori semana ida resin halo revizaun ba totalidade orsamentu retifikativu ne’e, ikus mai reuniaun Konsellu Ministru sira iha loron Kuarta 09 Agustu 2023 aprova duni osan ne’e ho montante lubuk ida atu ezekuta de'it to'o iha Dezembru.
Orsamentu ne’e hetan aprovasaun iha Konsellu Ministru depois halo diskusaun no aprovasaun ba projetu Proposta Lei ba alterasaun dahuluk Lei n. 15/2022, loron 21 fulan-dezembru, kona-ba Orsamentu Jerál Estadu ba tinan 2023 no Lei n. 2/2022, loron 10 fulan-fevereiru, kona-ba enkuadramentu ba Orsamentu Jerál Estadu no Jestaun Finanseira Públika no alterasaun daruak Lei n.8/2008, loron 30 fulan-juñu, Lei Tributária.
Ho projetu Proposta Lei ida ne’e, despeza totál husi Setór Públiku Administrativu tinan 2023 ho valór totál konsolidadu dolar amerikanu 1.771.867.112.
Administrasaun sentrál iha despeza ida ne’ebé prevee ho valór dolar amerikanu 1.633.000.000. Seguransa Sosiál, sein Fundu Rezerva Seguransa Sosiál, ho montante dolar amerikanu 130.965.306 (iha valór totál konsolidadu la kontabiliza montante dolar amerikanu 75.860.306 husi Seguransa Sosiál ne’ebé mai husi transferénsia administrasaun sentrál hodi evita ninia kontajen duplikada).
Rejiaun Administrativa Espesiál Oekusi Ambenu (RAEOA) iha despeza ida ne’ebé prevee ho valór dolar amerikanu 1.771.867.112.
