DILI (TOP) – International Finance Corporation (IFC) nu’udar instituisaun finanseira internasional ne’ebé oferese servisu investimentu, konsultoria no jestaun ativu hodi insentiva dezenvolvimentu setor privadu iha nasaun menus dezenvolvimentu sira kontinua fó konsellu ba governu atual hodi konsentra maka’as iha prosesu dezenvolvimentu infraestrutura báziku sira iha rai-laran.
International Finance Corporation (IFC) sujere ba governu Timor-Leste atu kontinua konsentra ba prosesu dezenvolvimentu infraestrutura báziku sira iha rai-laran hodi fó asesbilidade ba povu sira, no mós presija halo reforma ba setor privadu sira hodi sai forte liu-tan atu bele partisipa ativu liu-tan iha prosesu dezenvolvimentu nasionál.
IFC nu’udar instituisaun finanseira internasional ne’ebé oferese servisu investimentu, konsultoria no jestaun ativu hodi insentiva dezenvolvimentu setor privadu iha nasaun menus dezenvolvimentu sira inklui Timor-Leste. IFC mós nu’udar membru Grupu Banku Mundial (World Bank Group) ho nia kuartel jeral iha Washington, D.C., iha Estadus Unidus Amerika.
IFC hahu tama Timor-Leste iha tinan 2004 ne’ebé hare liu-ba dezenvolvimentu setor privadu sira iha rai-laran.
Atu kontinua hametin kooperasaun bilateral no kanaliza sira nia konsellu no sujestaun ne’e, IFC ne’ebé lidera husi IFC Regional Manager, Paramita Dagupta, IFC Resident Representative, David freedman, Senior Operation Officer, Lan Van Nguyen no Dario Quarantana, inklui Leila Martins ho Rita Pires nu’udar Operation Officer hasoru malu ona ho Vise Primeiru-Ministru, Ministru Koordenador ba assuntu Ekonómiku, Ministru Turizmu no Ambiente, Francisco Kalbuadi Lay iha gabinete Ministériu Turizmu no Ambiente iha Farol-Dili, Kinta 03 Agusto 2023.
Enkontru ne’ebé la’o kuaje oras ida resin, IFC aprezenta kona-ba saida mak sira halo ona durante ne’e iha Timor-Leste, no hakarak mós atualiza kona-ba saida mak sira bele halo tan iha rai-laran liu-liu iha governasaun atual.
IFC mós sei fó prioridade ba setor tolu ne’ebé importante hanesan reforma setor privadu, prioritiza ba programa dezenvolvimentu inklui dezenvolvimentu infraestrutura báziku.
“IFC mós prontu atu halo saida de’it nune’e lori progresu dezenvolvimentu ekonomia mai Timor-Leste,” informa IFC Regional Manager, Paramita Dagupta ba Vise Primeiru-Ministru, Ministru Koordenador ba assuntu Ekonómiku, Ministru Turizmu no Ambiente, Francisco Kalbuadi Lay iha gabinete Ministériu Turizmu no Ambiente iha Farol-Dili, Kinta 03 Agusto 2023.
Vise Primeiru-Ministru, Ministru Koordenador ba assuntu Ekonómiku, Ministru Turizmu no Ambiente, Francisco Kalbuadi Lay simu vizita delegasaun IFC ne’e ho laran ksolok tebes.
Vise Primeiru-Ministru ne’e, agradese ba IFC nia programa Public-Private Partnership (PPP) ne’ebé hala’o ona iha Timor-Leste hanesan iha Aeroportu, Portu Tibar, no projetu sira seluk ne’ebé IFC halo ona ho TradeInvest, SERVE, no setor sira seluk.
