DILI (TOP) – Gabinete Primeiru-Ministru (GPM) inklui Vise Primeiru Ministru ba Assuntu Ekonomiku no Vise Primeiru Minitru ba Assuntu Sosiais hala’o ona aprezentasaun Orsamentu Ratifikativu 2023 Ba Komité Revizaun Orsamentu (KRO).
Aprezentasaun ne’ebé lidera direita husi Primeiru-Ministru, Kay Rala Xanana Gusmão akompaña husi Vise Primeiru Ministru ba Assuntu Ekonomia, Fransisco Kalbuadi Lay, Vise Primeiru Minitru ba Assuntu Sosiais, Mariano “Assanami” Sabino Lopes no Diretora Jerál Gabinete Primeiru-Ministru, Ursula Ferrão Pinto no Xefe Gabinete Primeiru-Ministru, Elizabeth Exposto, hodi halo deskusaun iha salaun Auditóriu Ministériu Finansas, Aitarak Laran, Tersa 01 Agustu 2023.
Orsamentu Jerál Estadu (OJE) ba Gabinete Primeiru-Ministru inklui vise ministru rua ho totál milliaun U$ 4,400,630 fahe ba salariu no vensimentu mak U$ 401, 697,24, bens servisu U$ 3,998,932.76.
Husi totál OJE ne’e, Gabinete Primeiru- Ministru la gasta hotu, no fó fila osan hamutuk milliaun $1.000.000.00 ba kofre estadu.
“Ohin kalan ami mai aprezenta orsamentu totál milliaun U$ 4,400,630 fahe ba salariu no vensimentu U$ 401, 697,24, bens servisu U$ 3,998,932.76,” hateten Diretora Jeral Gabinete Primeiru-Ministru, Ursula Ferrão Pinto ba jornalista iha Ministériu Finansas iha Aitarak Laran, Dili, Tersa 01 Agostu 2023.
Iha aprezentasaun ne’e mós, Xefe Governu, Kay Rala Xanana Gusmão husu ba Gabinete Primeir-Ministru atu prepara ona planu asaun anual no programa Orsamentu Jerál Estadu 2024 nian.
Reuniaun Komite Revizaun Orsamentu realija husi Diresaun Jerál Planeamentu no Orsamentu (DJPO), Ministériu Finansas no Sekretariadu Grande Projetu, Ajénsia Dezenvolvimentu Nasionál (ADN), Komisaun Nasionál Aprovizionamentu (CNA), nu'udar Sekretariadu ba KRO Retifikativu 2023 remata ona iha Tersa 01 Agustu 2023 oras tuku 10 kalan.
