DILI (TOP) – Xefe Kaza Sivil Prezidénsia Repúblika, Jesuina Maria Ferreira Gomes hateten, Palásiu Prezidensiál husu orsamenntu retifikativu tinan 2023, ho montante millaun U$ 1 resin hodi sustenta atividade Prezidente Repúblika nian husi fulan ida ne’e to’o Dezembru.
Xefe Kasa Sivil ne'e hatutan, Orsamentu Jerál Estadu ne'ebé aloka ba Prezidénte Repúblika hamutuk millaun U$ 12,288.00 resin ne’ebé konsege ezekuta ona rihun 5 U$ resin, no nia balansu sei iha rihun U$ 6 resin.
"Kona-ba orsamenntu retifikativu liu-liu husu ba orsamentu ba pesoál nia salariu ho rendimentu, no mós atu selu subsidiu, selu seguransa sosiál ba funsionariu públiku sira ho kontratadu sira iha Prezidensiá Repúblika. Montante ba salariu no vensimentu Prezidensiá Repúblika ita husu iha orsamenntu retifikativu millaun U$ 1 resin," hateten Xefe Kaza Sivil ba Jornalista sira iha edifisiu Ministériu Finansas iha Aitarak Laran, Dili, Segunda, 31 Jullu 2023.
Nia hatutan, Primeiru Ministru Kay Rala Xanana Gusmão ho komisaun revizaun ba orsamentu husu atu hadia didi'ak fali ezekusaun orsamentu ne'e tuir kategoria lima hanesan salariu vensimentu, bens de serbisu, transferensia públiku, kapitál menor no kapitál dezenvolvimentu.
"Ida ne'e mais fasil, tanba sistema ida agora halo ne'e kompostu tebes ba programa atividade, aprezentasaun ne'e mós dala ruma komplika membru sira atu komprende akompañia didi'ak ezekusaun ne'e, ne'ebé husu Prezidensiá Repúblika atu organiza fali nia orsamentu ba ezekusaun ba iha kategoria lima, depois ami sei haruka mai fali iha Ministeriu Finansas," nia esplika.
