DILI (TOP) — Governu Singapura liu-husi Ministru Negósiu Estranjeiru Singapura, Vivian Balahkrisnan hateten, Singapura kompromitidu apoia Timor-Leste nia adezaun ba membru ASEAN, no prontu atu atu sosa produtu lokal sira husi Timor-Leste.
“Agradese tebes bele mai hasoru Primeiru-Ministru, Kay Rala Xanana Gusmão ema ida ne’ebé ita admira no respeita, nia mak ema ne’ebé luta ba independénsia nasaun ida ne’e, dadaun ida-ne’e sei hola parte iha ASEAN hanesan Singapura respeita tebes no hakarak serbisu hamutuk iha futúru,” hateten Ministru Vivian Balakrishnan hafoin hasoru malu ho Primeiru-Ministru Xanana, iha Gabinete Fronteira Marítima, iha Palásiu Governu, Segunda 24 Jullu 2023.
Ministru Vivian Balakrishnan konsidera Primeiru-Ministru Xanana nu’udar amigu antigu Singapura nian.
Iha fatin hanesan, Primeiru-Ministru, Kay Rala Xanana Gusmão agradese hodi konsidera vizita Ministru Negósiu Estranjeiru Singapura hatudu pasu pozitivu ba nasaun rua atu servisu hamutuk.
“Agora ami sei hare orgánika Governu nian, no sei diskute Orsamentu Retifikativu, más hanoin kona-ba futúru depois sei iha nafatin kontaktu, Singapura mós hakarak tau embaixada sira nian iha ne’e, maibé molok estabelese sei haree fatin,” dehan PM.
PM Xanana konsidera Singapura nu’udar país ida ne’ebé fó ezemplu di’ak ba Timor-Leste, iha área lubuk ida ne’ebé bele iha partisipasaun, kooperasaun ne’ebé di’ak ho Singapura.
Durante enkontru, PM Xanana akompaña hosi Ministru Negósiu Estranjeiru no Kooperasaun, Bendito dos Santos Freitas, no Embaixadora Timor-Leste iha Singapura, Maria Natália Viegas Carrascalão no Ministru Negósiu Estranjeiru Singapura akompaña hosi Embaixadór Repúblika Singapura ba Timor-Leste, Robin Hu no membru delegasaun sira.
Hafoin remata enkontru ho PM Xanana, Ministru Vivian mós hala’o enkontru bilateral ho Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Dato’ Sri Francisco Kalbuadi Lay, Ministru Komérsiu no Indústria, Filipus Nino Pereira, Ministru Transportes no Komunikasaun, Miguel Marques Gonçalves Manetelu, no Vise-Ministra ba Asuntus ASEAN, Milena Maria da Costa Rangel iha Ministériu Turizmu no Ambiente iha horas tuku 2 to’o remata iha tuku 3 resin.
Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Dato’ Sri Francisco Kalbuadi Lay hateten, ekontru ne’ebé la’o kuaje oras ida resin ne’e Singapura iha interese atu sosa produtu lokal sira husi rai-laran.
"Ba iha ita komérsiu no industria, Vivian Balakrihnan promete katak, se ita nia produtu ai-fuan, modo-tahan, ho produtu oi-oin husi agrikultura ne’ebé mak produz iha Timor-Leste ne’e Signapura prontu atu hola,” hateten Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Dato’ Sri Francisco Kalbuadi Lay.
Nia hatutan, enkontru ne’e mós ko’alia kona-ba assuntu ASEAN nian.
“Ami nain hira hamutuk hasoru Ministru Negósiu Estrajeiru Signapura ko’alia mós asuntu barak, primeiru mak ko’alia posibilidade preparasaun Timor-Leste nian ba iha ASEAN. Buat barak mak tenke prepara, husi ami nain hira ne’ebé mak toma konta asuntu ekonómia ami diskuti ho ministru ne’e, Vise PM ne’e esplika.
Singapura sei re-ativa voo rota Singapura-Dili lorloron
MNE Singapura mós hakarak tebes iha tempu tuir mai sei re-ativa voo rute Dili-Singapura no Singapura-Dili loron-loron hafoin paradu tiha molok tama ba pandemia Covid-19.
Iha parte turizmu nian, Singapura mós ho fuan hakarak ajuda liu-liu kapasidade treinamentu iha área hotu-hotu, aviasaun ninian, hotelaria liu-liu ba hospitalidade, nune’e, mós ba parte ekonómia, transporte telekomunnikasaun, sira sei oferese ba área hotu para atu ajuda Timor antes tama ba ASEAN.
Nia dehan, liu-liu hanesan full member tanba barak tebes depois tama ba ASEAN no vizita ne’e sei hala’o loron haat posibilidade sei ba vizita fatin sira seluk.
Iha parte dadersan, MNE Singapura ne’e hasoru uluk Prezidente Repúblika, José Ramos-Horta iha Palásiu Prezidensial, no Primeiru-Ministru, Kay Rala Xanana Gusmão iha Palásiu Governu.
