DILI – Durante seremonia hand over, Ministru Turizmu no Kultura, Dato’ Sri Francisco Kalbuadi Lay hato’o agradese uain ba governu daualu kona-ba saida mak governu anterior ne’e halo tiha ona iha setor turizmu no kultura.
“Nu’udar Timoroan, ita hotu prontu atu servi ba rai ne’e ho fuan, tanba ne’e saida mak ita boot sira halo tiha ona durante ne’e, ida di’ak ne’e ita sei kontinua, no ida ne’ebé ita hare ba la di’ak ne’e ita sei kompleta malu,” hateten Vise Primeiru-Ministru no Ministru Koordenador ba assuntu Ekonomia no Ministru Truzimu no Kultura, Dato’ Sri Francisco Kalbuadi Lay durante seremonia despedida ho eis Ministru Turizmu sesante, José Lucas do Carmo iha Centro Convenção Dili (CCD), Segunda 03 Jullu 2023.
“Ami sura nafatin ita boot sira nia kontribuisaun atu iha liur ka iha laran, rai ne’e ita hotu nian,” nia afirma.
Vise PM ne’e mós esplika ba funsionariu sira katak, durante tempu pandemia Covid-19 lori dezastre ba progressu ekonomia la’os iha Timor-Leste, maibé mós ba nasaun hotu iha mundu tomak.
Liliu afeta maka’as iha área turizmu, maibé iha tinan ida ne’e nia laran komesa hahu ona rekoperasaun ba ekonomia.
Governante ne’e rekoñese, sei iha serbisu lubuk ida mak governu atual tenke halo kona-ba assuntu ASEAN nian, no mós sei halo serbisu sira relasiona ho kompromisiu eleitoral ne’ebé kompromete on aba povu durante kampaña eleitoral iha tempu hirak liu-ba.
Molok ba atende serimonia despedida iha CCD, Vise PM ba assuntu Ekonomia ne’e hala’o uluk despedida ho Ministru Komersio Industria no Ambiente sesante, Joaquim Amaral iha Palásiu Governu.
No iha parte loraik, hala’o mós despedida ho Sekretariu Estadu ba Meiu Ambiente sesante, Deometrio Cabral iha edifisiu Acait, Dili.
