DILI (TOP) – Estadus Unidus liu husi Ajensia Estadus Unidus ba Dezenvolvimentu Internasional (USAID) no Ministeriu Finansas Timor-Leste ohin anunsia atividade foun ba tinan tolu ho millaun $10,2 hodi ajuda Governu Timor-Leste institusionaliza sistema komérsiu ne’ebé governa ho diak no modernu ne’ebe professional, transparante, responsavel, efisiente, efikaz, no responde ba Timor oan, no kompatível ho padraun internasional sira. Atividade ida ne’e sei impulsiona komérsiu no kresimentu ekonomia, hasae governu nia reseita, hasa’e integrasaun rejional no internasional, no mos haforsa boa-governasaun.
“Estadus Unidus kompremitidu hodi kontinua apoiu Timor-Leste iha implementasaun sistema komérsiu ne’ebé governa ho diak no modernu,” hateten Diretora Missaun USAID Zema Semunegus.
“USAID valoriza koperasaun no kolaborasaun ne’ebé diak tebes ho Ministeriu Finansas no Autoridade Aduaneria, inklui liu husi USAID nia Projetu Reforma Aduaneria ne’ebé foin remata dadaun, ne’ebé rezulta poupansa ho estimadamente millaun $38 ba empreza Timor nian liu husi aumenta iha efisiensia. Ami espera atu kontinua servisu ho Timor-Leste ne’ebé agora esforsu hela atu halo reforma domestika sira ne’ebé nesesaria hodi aliña totalmente ninia rejime komersial ho regra Organizasaun Mundial ba Komérsiu no liberaliza ninia komérsiu.”
Tuir pedidu Governu Timor-Leste nian, USAID sei servisu hamutuk ho Ministeriu Finansas, Autoriade Aduaneria, no ajensia governu sira seluk, no mos ho setór privadu, hodi hadiak governasaun komérsiu, fasilitasaun komérsiu, no prosesu-sira alfandega nian. Governu Estadus Unidus fornese millaun $10,2 liu husi USAID/Timor-Leste nia Atividade Governasaun Komérsiu hodi apoiu Autoridade Aduaneira Timor-Leste nian no ajensia governu sira seluk ne’ebé mak liga ho komersiu.
“Lansamentu USAID nia Atividade Governasaun Komérsiu foun ne’e marka pasu importante ida tan ba Ita-nia Autoridade Aduaneira,” hateten Ministru Finansas S.E. Rui Augusto Gomes.
“Apoiu millaun $10,2 ida-ne’e hanesan apoiu signifikante ida no esensiál hodi permiti Ita-nia Autoridade Aduaneira iha ninia jornada atu sai organizasaun ida ne’ebé independente, konfiavel no efisiente, tau kliente nu’udar sentru iha ninia prestasaun servisu esensiál. Ami agradese Estadu Unidus Amérika no Povu Amerikanu ba sira-nia apoiu ne’ebé firme. Ami prontu atu haklean liután Ita-nia parseria hodi alkanse Autoridade Aduaneria nia meta ba longu-prazu – ne’ebé mak atu halo komérsiu lailais liu, simples liu no justu liu.”
Apoiu ida ne’e sei hadiak prosesu importasaun no exportasaun hodi funsiona tuir mellor pratika global no padraun sira ne’ebé iha Organizasaun Alfandega Mundial (WCO) ninia Estrutura Padraun hodi Proteje no Fasilita Komérsiu Global, Revisaun Konvensaun Kyoto WCO nian, Revisaun Deklarasaun Arusha WCO nian, no Akordu Fasilitasaun Organizasaun Mundial Komérsiu nian, no Rekizitu ba adesaun iha Asosiasaun Nasaun Sudeste Aziátiku nian. Programa ida ne’e sei promove utilizasaun rekursu ne’ebé efisienti no efetivu liu tan no estabelese no jere estrutura adekuada ne’ebé sei fo komersiante no mos setór privadu sira lian hodi garante governu ida ne’ebé transparante no responsivu ba públiku. International Business Initiatives, empreza kiik ho feto mak nu’udar na’in ho baze iha Estadus Unidus mak sei implementa atividade ne’e.
