DILI (TOP) — Rezultadu peskiza husi Komisaun Nasionál ba Kombate Traballu Infantil (KNKTI) hatudu, labarik sira besik nain 52.000 involve iha serbisu forsada iha teritóriu nasionál.
KNKTI hamutuk ho nia parseiru sira hanesan UNICEF no ILO halo peskiza kona-ba traballu infaltil ne’e hahu iha tinan 2016 to’o tinan ida ne’e hodi ikus mai konsege detekta labarik besik nain 52.000 mak oras ne’e involve halo serbisu todan hodi ajuda inan-aman sira.
Prezidete ba KNKTI, Aniceto Leto Soro katak, husi númeru ne’e hatudu labarik sira husi munisipiu Ermera mak barak liu no tuir kedas mak Oe-Kusi Ambeno.
“Ami halo peskiza nasionál kualitativu no kuantitavu ne’ebé halo iha 2016 no 2022, hatudu traballu infantil iha Timor-Lorosa’e por volta de 52.000 mill ne’ebé konsidera serbisu ne’ebé aat, iha ne’ebé prejudika ba sira ninia edukasaun, dezenvolvimentu fiziku no intelektual. No, dadus ami aprezenta tiha ona munisípiu ne’ebé mak (traballu infantil) barak liu iha Aileu, Ainaro, Ermera, Oekusi no Suai mós, maioria labarik sira serbisu ho idade tuir ami ninia rezultadu peskiza ne’e hahú husi tinan 5 to’o tinan 17,” Prezidente KNKTI Aniceto ba jornalista sira hafoin reuniaun ho xefe estadu José Ramos Horta iha pallasu prezidensial Dili, Segunda 06 Juñu 2022.
Eis Inspetor Jeral Traballu ne’e hatutan, iha enkontru ne’e alem de hato’o rezultadu serbisu, ko’alia mós kona-ba planu husi komisaun ne’e ba futuru liu-liu oinsá halo estratejia para bele kombate ka halo redusaun ba númeru labarik ki’ik sira hala’o serbisu hodi prejudika ba sira ninia futuru ka estudu. No, biban ne’e konvida mós xefe estadu bele ba partisipa iha komemorasaun loron internasionál labarik serbisu hodi fó netik lia-fuan badak ruma.
“Objetivu mai reuniaun ho prezidente, mai hato’o mós planu ba oin atu halo saida liuliu kona-ba área kontra traballu infantil. No, formalmente aprezenta ami nia konvite ba prezidente, atu bele partisipa hodi fó mensajen iha selebrasaun loron mundial traballu infantil ne’ebé sei realiza iha Suai 15 Juñu,” nia afirma.
“Ami husi komisaun nasionál kontra traballu infantil hamutuk ho parseiru dezenvolvimentu sira hanesan ILO no UNICEF, ne’ebé durante ne’e apoia ami ninia atividade ba eliminasaun traballu infantil iha Timor Lorosa’e.”
