DILI (TOP) — Governasaun atual nia Orsamentu Jeral Estadu desde tinan 2018 to’o ohin loron la konsege loke kampu serbisu foun ba joven sira iha rai-laran, maibé Primeiru-Ministru Taur Matan Ruak sente kontente tebes ho inisiativa joven produtivu sira ne’ebé nadodon ba buka serbisu iha rai-liur, tanba kauza husi kampu serbisu ih arai-laran sei mukit tebes.
“Em primeiru lugar ita apresia sakrifisiu no dedikasaun ita nia joven sira ne’ebé halo esforsu ba iha rai li’ur hodi kontribui ba dezenvolvimentu ita nia nasaun nian. Hanesan ita hotu hatene, ita nia nasaun foin nurak foin 20 anos la iha kapasidade para kria empregu ba ita nia joven sira hotu, entaun dalan ida mak governu buka dalan atu hetan empregu ba joven sira iha rai li’ur,” xefe governu Taur Matan Ruak ba jornalista sira hafoin enkontru semanal ho xefe estadu iha pallasu prezidensiál Aitaraklaran Bebora-Dili, Kinta 09 Juñu 2022.
PM Taur hatutan, tanba la iha kapasidade atu loke rasik kampu serbisu mak daudaun ne’e governu buka meius oioin hodi haruka nafatin joven sira ba rai-liur alende Korea no Australia, governu sei buka meius seluk hodi haruka sira sai iha nasaun sira seluk iha Europa ne’ebá.
“Parseiru governu nian hanesan Korea Sul, Australia no governu mós haree hela fatin seluk, buka esplora oportunidade seluk hanesan iha Inglatera, Irlanda no mós Japaun ho fatin seluk tan,” nia esplika.
PM Taur rekoñese joven sira nu’udar eroi tanba ho sira nia kontribuisaun bele halo ekonomia rai laran la’o kapas tebes.
“Tanba ne’e, governu apresia ida ne’e no halo esforsu para kontinua fó apoiu nafatin ba ita nia joven sira, tanba realmente ne’e la’ós fasil husik hela nia moris fatin no familia sira, más ha’u hanoin sira ita nia eroi tanba fó kontribuisaun ba dezenvolvimentu maka’as loos ba nasaun. Hanesan ita hotu hatene iha 2021 joven sira iha rai li’ur kontribui milaun $121 ba ita nia ekonomia rai laran,” xefe governu reforsa.
Nia dehan, ajuda ba kresimentu ekonomia no mós ajuda kombate ki’ak no mukit iha família sira.
