COVID-19: Sala izolamentu mamuk ona

DILI (TOP) – Sala izolamentu oras ne’e mamuk ona, maibé sei iha ema hamutuk nain 435 mak oras ne’e hein hela sira nia rezultadu teste, no ema hamutuk nain 855 mak rezultadu teste hatudu negativu.

Kordenador Forsa-Tarefa  Prevensaun no Mitigasaun Surtu Covid-19, dotór Sergio Lobo katak, ema hamutuk nain 1314 mak ohin tuir tiha ona teste, horseik iha nain 1220. Kazu konfirmadu nafatin 24 ne’ebé di’ak hotu ona no fila ona hela iha sira nia uma ida-idak. Total ema ne’ebé di’ak ona mak hamutuk nain 28 inklui nain 5 ne’ebé antes ne’e hela iha sala izolamentu sentru saúde Vera Cruz, maibé ohin sira mós di’ak hotu ona. 

“Hotu-hotu ita agora laiha ona pasiente iha Vera Cruz,” hateten dotór Sergio liu husi konferénsia ba imprensa iha sala situasaun iha Sentru Integradu ba Jestaun Krize iha Sentru Konvensaun Dili, Sesta 15 Maiu 2020.

Nia hatutan, ema hamutuk nain 44 mak oras ne’e sei kumpre hela kuarentena, no hamutuk nain 2238 ne’ebé husi Dili hamutuk nain 1738, no munisipiu nain 500 mak kumpre ona loron 14.

Maske rezultadu ohin hatudu mudansa signifikante kona-bá moras virus corona (Covid-19) iha rai-laran, maibé dotór Sergio klarifika,  horiseik iha sidaudaun Timor oan ida ne’ebé tama klandestinamente. Seguransa prende no agora tau iha kuarentena.

Nia hatutan, Ministériu Saúde halo daudaun vijilánsia sindromika, katak teste ema hotu ne’ebé aprezenta ho sintomas respiratoriu iha fasilidade saúde sira, no mós vijilánsia sentinela.

“Husu ba komunidade atu kontinua uja fasilidade saúde sira tuir ida-idak nia nesesidade,” rekomenda dotór Sergio.

Nia mós fó apelu atu komunidade atu kontinua kumpre regra distansiamentu fíziku minimu metru ida. Tur hakmatek iha uma, no  evita halibur malu, Uza máskara bainhira sai husi uma, keta rona boatus no notisias husi fonte ne’ebé la loos.

“Rona no fiar deit informasaun sira ne’ebé sai husi Konferénsia imprensa ne’ebé SS-CIGC  realiza  loron-loron”.

Nia rekomenda atu kontinua prátika ijiene pesoal, liu-liu  fase liman bebeik no liman labele kona inus, matan ho ibun Uza bainhira seidauk fase liman ho sabaun.

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE