Oekusipost.com Dili – Total ema hamutuk nain 854 mak tuir tiha ona teste laboratóriu, no Sábadu ohin sei iha ema nain 80 mak oras ne’e hein hela sira nia rezultadu teste ne’ebé sei iha hela prosesu laran.
Koordenador Tarefa Serbisu ba Mitigasaun no Prevensaun Covid-19, dotór Sergio Lobo hateten, númeru ema ne’ebé teste ona horseik hatudu 830, no ohin sa’e ba 854. Kazu konfirmadu nafatin ba ema nain 24 ne’ebé hamutuk nain 21 mak di’ak fali ona, no falta ema nain 7 mak oras ne’e sei kontinua baixa iha sala izolamentu iha Sentru Saúde Vera Cruz hodi hetan tratamentu intensivu.
“Total rezultadu teste negativu ohin hamutuk nain 750, no horseik iha nain 692,” hateten dotór Sergio liu husi konferénsia ba imprensa iha sala situasaun iha Sentru Integradu ba Jestaun Krize, Sábadu 9 Maiu 2020.
Nia hatutan, númeru hein rezultadu teste horseik hamutuk nain 114, no ohin tun ba nain 80 mak sei hein hela. Ema hamutuk nain 173 mak oras ne’e sei kontinua hela iha kuarentena.
“Horseik hamutuk nain 135, iha aumenta itoan, tanba profisionál saúde sira ne’ebé foin remata sira nia serbisu iha sala izolamentu oras ne’e ba tama fali iha kuarentena inklui maluk balun mai husi Austrália,” afirma dotór Sergio.
Nia hatutan, ema hamutuk nain 2083 mak liu ona loron 14 ne’ebé fahe ba Dili hamutuk nain 1645, no nain 438 husi munisipiu sira.
Entretantu, númeru profisional saúde sira ne’ebé oras ne’e tama kuarentena hamutuk nain 45.
Maske nune’e, dotór Sergio kontinua apela ba komunidade sira atu kontinua kumpri regras distansiamentu fiziku, no distansiamentu sosial, bainhira sai ba liur karik uja máskara.
“Husu ba komunidade sira atu tur hakmatek iha uma. Atu uja máskara bainhira sai ba liur,” nia rekomenda.
