AMBENO (TOP) - Prezidente Autoridade ba Rejiaun Administrativu Espesial Oe-Kusi Ambeno (RAEOA), Régio da Cruz Salu kontinua mantein Benedito Ulan hodi asume kargu nu’udar Jestór Sub-rejiaun Oe-Silo, tanba despaisu husi Diretor Diresaun Rejional Administrativu laiha poder juridiku hodi muda ema tun-sa’e durante mandatu periodu fulan tolu ne’e.
Iha loron 29 Setembru 2025, Koordenadór Partido Demokrátiku (PD) RAEOA atual Diretor Rejional Administrasaun RAEOA, José “Tanesib” Anuno hato’o pedidu ida ba Prezidente Autoridade RAEOA ho objetivu atu troka hotu kedas funsionariu Administrasaun no Administrador Posto 4 ne’ebé eziste iha RAEOA, tanba funsionariu hirak ne’e maioria CNRT, maibé Prezidente Autoridade fila responde ba karta ne’e katak, labele troka tun-sa’e ema tuir ida-idak ninia hakarak de’it.
Konteudu Pedido Koordenadór Partido Demokrátiku (PD) RAEOA atual Diretor Rejional Administrasaun RAEOA, José “Tanesib” Anuno hato’o pedidu ida ba Prezidente Autoridade RAEOA;
Número: 60/RAEOA/DRA/IX/2025
Hato’o ba: Sua Ex.cia Dr. Régio Servantes Romeia da Cruz Salu, Prezidente Autoridade RAEOA
Assuntu: Nomeasaun Kargu Xefia ba Diresaun Rejional Administrasaun RAEOA
Hare tuir Lei númeru 18/2023, 30 Novembro, Alterasaun datoluk ba Lei número 2/2014, 18 Junho ne’ebé kria Região Administrativa Especial Oe-Cusse Ambeno RAEOA. Hare tuir lei número 93/2022, 22 Desembru, Alterasaun daruak ba Decreto Lei númeru 5/2015, 22 Janeiru kona-ba estatuto RAEOA, tuir Resolução do Governo númeru 37/2025, 28 Agustu, kona-ba Nomeação ba Presidente no Membru Autoridade Região Administrativa Especial de Oé-Cusse Ambeno ba fulan tolu.
Relasiona ho assuntu iha leten, Diretor Regional da Administração RAFOA, hakarak hato’o ba Sua Ex.cia Dr. Régio Servantes Romeia da Cruz Salu, Prezidente Autoridade RAEOA, Pedido Nomeasaun Kargo Xefia ba Direção Regional da Administração to’o Administrador do Posto-4 ne’ebé iha RAEOA, hodi hala’o serbisu diak liu tan, tuir professionalismo nebe sira iha. Tanba ne'e, husi Diretor Regional da
Administração, hakarak hato'o ba Sua Ex.cia Dr. Régio Servantes Romeia da Cruz Salu, Prezidente Autoridade RAEOA, hodi analiza no foti dezisaun ba Pedido ne’ebé aprezenta.
Hatan ba karta ne’e, Prezidente Autoridade ba RAEOA, Régio Servantes Romeia da Cruz Salu rejeita kedas karta ne’e hodi husu ba Diretor Rejional Administrasaun RAEOA, José “Tanesib” Anuno atu labele troka Jestor Sub-rejiaun sira, maibé tenke mantein sira hodi kontinua hala’o sira nia serbisu hanesan baibain.
“Husu ba Diretor Rejional Administrasaun Dr. José Anuno atu mantein kargu Administrador Posto Oe-Silo, Sr. Benedito Ulan,” karta resposta PA RAEOA iha loron 01 Outubru 2025.
Maibé, antes ne’e iha loron 02 Setembru 2025, Prezidente Autoridade RAEOA hasai sirkular ida númeru referensia, 02/GAB/PA/RAEOA-TL/IX/2025, ho asuntu atu hakotu (cessasaun) ba kargu xefia sira, hanesan xefe departementu diretór rejionál husi estrutura sesante nian.
“Ne’e la ejiste ona inklui jestór sub-rejiaun sira, entaun husi ne’e, jestór sira hala’o serbisu hanesan fokál point de’it, labele asina dokumentu ruma, tanba seidauk aprova lei organograma ho funsionáriu sira-ne’ebé destakadu iha postu ida-idak, entaun sira (jestór) hala’o kna’ar ne’e, hanesan responsavél de’it, ami hasai sira la presiza karta ezonerasaun, tanba sirkulár ezonerasaun ne’e hasai ona husi Prezidente Autoridade iha loron 02 Setembru 2025.”
Nia esplika, nu’udar funsionáriu públiku, asumi kargu másimu tinan rua de’it, depois nomeia fali ema foun, bele mantein no bele halo mudansa.
“Ida-ne’e mós hanesan, ita halo avaliasaun ba sira-nia serbisu, sira bele mantein no bele tau ema seluk, ba kargu xefia sira, ita seidauk aprova, entaun ita destaka de’it ema sira-ne’ebé mak atu sai fokál point iha jestór sira-nia fatin, hodi hein aprovasaun organograma foun ne’e, tanba provasaun ne’e mós sei públika ofisiál iha Jornál Repúblika,” esplika konteudu karta PA RAEOA iha loron 02 Setembru 2025.
Maske nune’e, Prezidente Autoridade RAEOA desidi ona hodi kontinua mantein Administrador Posto Administrativo 4 ne’ebé existe iha RAEOA.
