Oekusipost.com Dili – Evolusaun no progresu moras virus corona (COVID-19) iha Timor-Leste kuaje semana ida resin ona hatudu sinal di’ak, tanba númeru kazu teste laboratóriu ne’ebé hatudu negativu k a livre husi virus ne’e sa’e maka’as kompara ho númeru kazu konfirmadu ne'ebé nafatin de'it ba nain 24.
Koordenadora Ofisiál Ligasaun Forsa-Tarefa no Porta-vóz Sala Situasaun Sentru Integradu ba Jestaun Krize, dotora Odete da Silva Viegas hateten, total númeru kumulativu teste hamutuk nain 830 (horseik nain 764), númeru hein rezultadu iha nain 114, no kazu konfirmadu nafatin nain 24. Kazu foun ohin laiha.
“Total rezultadu teste laboratóriu negativu hamutuk nain 692, no nain 21 di’ak tiha ona,” hateten dotora Odete liu husi konférensia ba imprensa Sentru Integradus ba Jestaun Krize iha Sentru Konvensaun Dili, Sesta 8 Maiu 2020.
Nia hatutan, to’o oras ne’e sei iha ema hamutuk nain 7 mak simu hela tratamentu intensive iha sala izolamentu iha Sentru Saúde Vera Cruz, no iha profisional saúde hamutuk nain 44 mak oras ne’e sei hela iha kuarentena.
Kona-bá total kuarentena obrigatóriu no auto-kuarentena, tuir dotora Odete katak oras ne’e ema hamutuk nain 135 mak sei kumpre hela kuarentena obrigatóriu iha Dili laran, no hamutuk nain 101 mak iha munisipiu sira, inklui mós ema hamutuk nain 32 mak kumpre auto-kuarentena iha munisipiu sira, Dili laiha maske Arsenio Paixão Bano oras ne’e kumpre hela auto-kuarentena iha nia uma rasik iha Dili laran.
Iha mós ema hamutuk nain 2080 mak fila tiha on aba sira nia um aka kumpre ona loron 14 ne’ebé husi Dili iha nain 1642, no nain 438 husi munisipiu sira.
Maske númeru kazu COVID-19 iha rai-laran hahu iha mudansa di’ak, maibé dotora Odete nafatin husu ba sidadaun sira iha rai-laran atu kontinua mantein distansia fiziku, distansia sosial, nafatin mantein hijiene pessoal liu husi fase liman bebeik ho sabaun, uja máskara bainhira sai ba liur, evita halibur malu, no karik mosu sintomas ruma ba moras COVID-19 favór tenke kontaktu ba númeru 119 hodi hetan atendimentu lais ka bele mós hakbesik a’an ba fasilidade saúde sira ne’ebé besik ita boot sira nia hela fatin.
