Oekusipost.com Dili – Númeru kazu moras virus corona (COVID-19) iha rai-laran oras ne’e sa’e ona ba ema nain 23, ida mak di’ak tiha ona.
“Tuir atualizasaun ohin 21 Abril 2020 iha oras tuku 12 meudia, ema hamutuk nain 361 mak tuir tiha ona testa laboratóriu. Husi teste ne’e iha kazu konfirmadu 23, aumenta tan ida kompara ho horseik, tanba kazu ida iha Likisa ne’ebé provavél ne’e konfirmasaun mai husi Darwin katak nia postiviu,” hatete Koordenador ba Prevensaun no Mitigasaun COVID-19, dotor Sergio Lobo liu husi konferensia ba imprensa iha Sala Situasaun Sentru Integradu ba Jestaun Krize iha Sentru Konvensaun Dili, Tersa 21 Abril 2020.
Eis Ministru Saúde ne’e hatutan, kazu negativu hamutuk ema nain 254, kazu provavel horseik iha ema nain 5, maibé Tersa ohin tun fali ba ema nain 4. Sira ne’ebé sei hein rezultadu horseik ne’e iha ema nain 92, ohin tun ba ema nain 80.
“Teste foun ne’ebé ohin halo ne’e 24,” Lobo esplika.
Nia hatutan, ema sira ne’ebé oras ne’e sei kontinua hela iha kuarentena hamutuk nain 518. Ema hamutuk nain 101 mak ohin sai ona husi kuarentena. Númeru ne’e kompostu husi ema hamutuk nain 83 sai husi kuarentena sira iha Dili, no ema hamutuk nain 17 mak husi Oe-Kusi Ambeno, no husi Ainaro ema nain ida.
Maibé iha ema hamutuk nain 20 mak tama mai ho ro iha tasi laran, no agora sei iha hela ro laran. No ema nain ida de’it mak tama klandestinamente, agora tama hela kuarentena iha Tibar, munisipiu Likisa. Inklui membru polisia ida mós tama ona kuarentena, tanba nia iha kontaktu ho ema nain 20 ne’e. Profisional saúde sira hamutuk nain 23 mak oras ne’e mós sei kontinua tama kuarentena iha Dili, tanba ema sira ne’e mak durante ne’e fó antedimetu saúde ba sidadaun kuarentena sira iha rai-laran.
Nia hatutan, teste sira ne’ebé haruka ba Darwin (Australia) hodi halo konfirmasaun, no halo validasaun tuir fali mai iha konkordansia pur sentu 100.
“Ne’ebé fiar ba ita nia kolega oan sira serbisu iha laboratóriu. Sira halo esforsu boot ida, no ita kompara ho semana rua ka tolu ba kotuk, ita halo progresu ida boot tebes,” dotor Sergio sujere.
Total dadus Segunda horseik hatudu, ema hamutuk nain 327 mak sai suspeitu, nain 92 mak hein hela rezultadu teste laboratóriu, ohin tun ba nain 80 nain 5 provavel, maibé ohin tun ba nain 4, nain 22 mak pozitivu, ohin sa’e ba nain 23 no nain 208 mak rezultadu hatudu negativu, , ohin sa’e ba 254 inklui nain ida di’ak tiha ona.
