Oekusipost.com Dili – Hafoin mosu asaun rezistensia husi pasiente moras virus corona (COVID-19) iha kuarentena Hotel Novo Horizonte iha Segunda 20 Abril 2020 oras tuku 7 kalan, ikus mai pasiente ne’e koopera ho ekipa ambulansia hodi evakua ona ba sala izolamentu iha sentru saúde Vera Cruz iha oras tuku 11 kalan.
Komandante Polisia Munisipiu Dili, Superintendente Xefe Armando Monteiro hatete, maske mosu asaun rezistensia husi pasiente ne’e, maibé ikus koopera ona.
“Horkalan evakua kedas ba sala izolamentu iha oras tuku 11 kalan,” hatete komandante Armando ba jornalista sira iha kuarentena Times Square, Fatuhada-Dili, 21 Abril 2020 .
Kareta ambulansia ne’ebé durante ne’e evakua pasiente COVID-19 iha rai-laran tama ba Hotel Novo Horizonte iha loron Segunda 20 Abril 2020 iha oras tuku 7 kalan hodi evakua tan pasiente ida iha kuarentena ne’e atu lori ba tau iha fatin izolamentu, maibé mosu rezistensia husi pasiente ne'e rasik ho nia maluk sira iha kuarentena ne'e nia laran hodi ikus mai impede tiha ekipa ambulansia sira labele evakua pasiente ne'e iha oras tuku 7 kalan. Ikus mai konsege evakua ona horkalan iha oras tuku 11.
Ho evakuasaun horkalan ne’e, hatudu okupante iha sala izolamentu oras ne’e sa’e ba nain 28 ona.
Dadus ohin tuku 12 meudia hatudu, ema hamutuk nain 327 mak sai suspeitu, nain 92 mak oras ne’e hein hela rezultadu teste laboratóriu, nain 5 mak provavel, nain 22 mak oras ne’e pozitivu, no nain 208 mak rezultadu hatudu negativu inklui nain ida di’ak tiha ona.
Notisia relevante: Pasiente COVID-19 "Lakohi Sai" Husi Hotel Novo Horizonte
