Oekusipost.com Dili - Pasiente moras virus corona (COVID-19) ne'ebé hela iha kuarentena Hotel Novo Horizonte "lakohi sai" husi fatin ne'e hodi ba sala izolamentu iha sentru saúde Vera Cruz, atu nune'e bele hetan tratamentu intensivu.
Kareta ambulansia ne’ebé durante ne’e evakua pasiente COVID-19 iha rai-laran tama ba Hotel Novo Horizonte iha loron Segunda 20 Abril 2020 iha oras tuku 7 kalan hodi evakua tan pasiente ida iha kuarentena ne’e atu lori ba tau iha fatin izolamentu, maibé mosu rezistensia husi pasiente ne'e rasik ho nia maluk sira iha kuarentena ne'e nia laran hodi ikus ma i impede tiha ekipa ambulansia sira labele evakua pasiente ne'e iha oras tuku 7 kalan.
Hafoin mosu asaun rezistensia ne'e, komandante polisia munisipiu Dili, Superintendente Xefe Armando Monteiro ho nia ekipa balun mós to'o iha fatin ne'e, no konsola pasiente ne'e atu bele koopera ho ekipa ambulansia hodi bele evakua ona ba fatin izolamentu, maibé la hetan solusaun. Nune'e, ekipa ambulansia no polisia fó ultimatum ba pasiente durante oras tolu nia laran atu tenke koopera ho ekipa ambulansia nian.
Entretantu, iha parte lorokraik tuku 3 ohin, P ortavóz Sentru Integradu ba Jestaun Krize, dotor Rui Maria de Araújo katak rejista tan ona kazu foun tolu hodi halo númeru okupante sala izolamentu husi nain 22 sa’e ba nain 27.
Notisia relevante: COVID-19: Okupante Sala Izolamentu Sa’e ba 27
“Sira nain 27 husi sira ne’ebé konfirmadu, no sira ne’ebé provavel oras hela iha sala izolamentu sentru saúde Vera Cruz, kazu konfirmadu hela ketak no kazu provavel tau ketak,” hateten dotor Rui liu husi konferensia ba imprensa iha Sentru Konvensaun Dili, Segunda 20 Abril 2020 iha oras tuku 3 lorokraik.
Liu tiha ida ne’e, iha tuku 7 kalan ekipa ambulansia mós hakat ba kuarentena Hotel Novo Horizonte iha Metiaut hodi evakua tan pasiente ida, maibé mosu asaun rezistensia husi okupante sira iha kuarentena ne’e rasik.
