Oekusipost.com Dili – Progresu ba moras virus corona (COVID-19) iha rai-laran kontinua evolui a’an husi loron ba loron, tanba númeru pasiente iha iha sala izolamentu oras ne’e sa’e ona ba nain 27.
Bazeia ba dadus Domingo horseik hatudu, Timoroan hamutuk nain 22 ne’ebé kompostu husi kazu positivu nain 18 no kazu provavel nain 4, maibé ohin portavóz Sentru Integradu ba Jestaun Krize, dotor Rui Maria de Araújo katak rejista tan ona kazu foun tolu hodi halo númeru okupante sala izolamentu husi nain 22 sa’e ba nain 27.
Nia hatutan, total kazu konfirmadu hamutuk nain 22 ona, kazu foun husi horseik mai ohin iha kazu foun tolu. Total kazu rekooperadu laiha mudansa, ida nafatin. Total kazu suspeitu iha 327, horseik iha 323. Total kazu provavel hamutuk nain 5. Total rezultadu laboratóriu seidauk hatene iha nain 92, total rezultadu laboratoriu negativu iha nain 208. Total ema iha kuarentena oras ne’e dadauk iha 597. Husi númeru ne’e iha nain 15 mak iha auto-kuarentena iha munisipiu, 474 mak tama kuarentena iha Dili, no nain 108 mak iha munisipiu sira.
“Sira nain 27 husi sira ne’ebé konfirmadu, no sira ne’ebé provavel oras hela iha sala izolamentu sentru saúde Vera Cruz, kazu konfirmadu hela ketak no kazu provavel tau ketak,” hateten dotor Rui liu husi konferensia ba imprensa iha Sentru Konvensaun Dili, Segunda 20 Abril 2020.
“Kazu konfirmadu no kazu provavel ne’ebé agora iha Timor-Leste sei nafatin restritu ba grupu ka klaster 6. Aumenta klaster rua kompara ho loron rua liuba. Klaster foun mak Hotel-Lecidere, no grupu professor Portugues sira iha Likisa,”
Grupu ida ne’e, nia hatutan, iha ema nain rua ne’ebé oras ne’e dadauk iha Timor-Leste, hanaran sub-grupu TL, no ema ida ne’ebé detekta iha Portugal, hanaran sub-grupu P.
Sub-grupu TL la hela hamutuk iha uma ida ho sub-grupu P. Sira mós viajen mai Timor-Leste iha periodu ne’ebé lahanesan. Nain rua ne’ebé oras ne’e iha ne’e to’o iha TL iha loron 28 Fevereiru liuba, no ida ne’ebé iha Portugal to’o iha TL iha loron 8 Marsu liuba.
“Sub-grupu TL to’o agora laiha sintomas, maibé tanba sira tama iha kriteriu kontaktu besik ho sub-grupu P, sira submete ba ezame laboratorial no rezultadu ikus, konfirmasaun husi Royal Darwin Hospital hatudu ida positivu ho karga viral ne’ebé ki’ik oan, no ida indeterminadu,” nia afirma.
Nia konta, sub-grupu P ka ida ne’ebé agora iha Portugal hatudu sintomas durante nia viajen fila ba Portugal iha loron 4 Abril liuba hafoin halo ezame laboratóriu iha loron 6 Abril 2020 no rezultadu hetan positivu.
Profesor sira ne’ebé hela hamutuk ho ida ne’ebé iha Portugal, sira nia rezultadu teste laboratóriu hatudu negativu. No motorista ne’ebé tula professor sira ba-mai mós nia rezultadu ezame laboratóriu negativu.
Hahu husi Estadu emerjénsia vigora, desde loron 27 Marsu to’o ohin loron, professor sira ne’e ida-idak hela iha nia uma.
