Oekusipost.com Dili – Progressu moras virus corona (COVID-19) durante loron hirak laran seidauk rezista tan númeru kazu positivu, maibé númeru kazu suspeitu mak iha hodi sa’e husi nain 370 ba nain 382.
“Total suspeitu aumenta itoan ohin sa’e 382 sura husi fula Marsu mai. Horseik iha 370. Total kazu provavel mós nafatin ba nain 4 de’it,” h ateten portavóz Sentru Integradu ba Jestaun Krize, dotor Rui Maria de Araújo liu husi konferensia ba imprensa iha Sentru Konvensaun Dili, Kinta 23 Abril 2020.
Nia esplika, total kazu konfirmadu laiha mudansa hanesan ho horseik nian. total kazu foun husi horseik mai ohin mós laiha.
Total rezultadu teste laboratóriu ne’ebé seidauk hatene ka sei hein hela, horseik iha nain 47, ohin tun ba 28. Rezultadu sira ne’ebé mai ona ne’e hatudu negativu hotu. Aumenta total rezultadu laboratóriu negativu ba 397, horseik iha 297.
Nia hatutan, total ema iha kuarentena ka konfinamentu obrigatóriu to’o ohin meudia hamutuk 432. Husi total ne’e, iha 27 mak auto-kuarentena iha munisipiu hotu. Nain 327 tama kuarentena iha Dili. Númeru ne’e inklui profisional saúde sira ne’ebé durante ne’e fó asistensia médiku ba sidadaun sira iha kuarente iha Dili laran. Ema hamutuk nain 1643 mak liu ona periodu kuarentena obrigatóriu, ne’ebé fahe ba ema nain 334 husi munisipiu, no nain 1309 husi Dili.
