Oekusipost.com Dili – Ema nain 6 ne’ebé antes ne’e hetan positivu ba moras virus corona (COVID-19), oras ne’e di’ak fali ona, maibé seidauk bele sai husi sala izolamentu, tanba sei hein dezinfekta hotu sira nia sasan ne’ebé sira lori mak foin bele sai ba sira nia uma.
Koordenador Tarefa Sebisu ba Prevensaun no Mitigasaun COVID-19, dotór Sergio Lobo hateten, tuir loloos sira bele sai ona husi sala izolamentu, maibé sei hein dezinfekta sira nia sasan ne’ebé sira lori mak foin sira bele sai ba fatin sira ne’ebé sira hela ba.
“Sira di’ak tiha ona,” hateten dotór Sergio liu husi konferénsia ba imprensa iha Sala Situasaun Jestaun Krize iha Sentru Konvensaun Dili, Sesta 24 Abril 2020.
Profisionál saúde ida positivu kona COVID-19
Profisional saúde hamutuk nain 20 resin ne’ebé oras ne’e hela iha sala izolamentu Vera Cruz, ida mak pozitivu kona moras COVID-19, maibé nia kondisaun kontinua estavél
Dotór Sergio katak, iha mós kazu foun ida husi pessoal saúde ne’ebé durante ne’e fó atendimentu saúde iha sala izolamentu iha Vera Cruz no Hospital Nasionál Guido Valadares mós oras ne’e positivu kona moras COVID-19. Nia oras ne’e kontinua hela iha Vera Cruz hodi hetan tratamentu intensivu , no nia kondisaun saúde di’ak hela.
Nia hatutan, maske oras ne’e ema barak mak preokupa kona-bá posibilidade iha ona transmisaun lokal, liliu iha Likisa, maibé dotór nafatin fó resposta katak, seidauk hetan evidensia kona-bá transmisaun lokal.
“No laboratóriu nasionál mós halo ona teste ba ema nain 17, maibé sei hein hela rezultadu,” nia hateten.
Nia hatutan, rezultadu teste laboratóriu hamutuk ema nain 392. Kazu konfirmadu hamutuk 24, aumenta ida kompara husi horseik. Rezultadu teste negativu hamutuk nain 47, kazu foun ida.
“Kazu provavél ne’ebé ami teste negativu hotu. Sira agora muda sai ona husi Vera Cruz ba fali kuarentena,” nia esplika.
Sei iha nain 21 mak sei hein rezultadu teste.
