Ema Nain 20 Ohin Sai Ona Husi Kuarentena

Ema hamutuk nain 11 sai husi kuarentena Mangkok Hotel Luxury Sábadu ohin. Foto Oe-Kusi Post/Marcelino Bata

Oekusipost.com Dili – Ema hamutuk nain 20 mak ohin sai ona husi kuarentena rua iha munisipiu Dili.

Diretór Apoiu Juridiku Ministériu Saúde, Belarmino da Silva Pereira hatete, husi númeru 20 ne’e nain 9 (mane hotu) husi kuarentena Hotel Luz Clarita, no nain 11 husi kuarentena Mongkok Luxury Hotel. Entre ema nain 11 ne’e, iha mane nain 6, no feto 5. Hamutuk nain 4 (feto hotu) husi munisipiu Dili, Bobonaro iha nain rua, Manatuto ida, Ermera nain rua, no Lautem nain rua. Hamutuk nain 11 husi kuarentena Mongkok Luxury Hotel.

“Sira hahu tama iha kuarentena iha loron 2 Abril 2020, tuir loloos sira sai iha Sesta horseik, sira nia kolega sira mak sai horseik iha kuarentena Hotel-Vilaverde ne’e, sira labele sai tanba sei iha assuntu klinika balun mak sira tenke liu, nune’e rezultadu foin sai, ho nune’e ohin mak sira foin bele sai,” hatete diretór Belarmino ba jornalista sira iha Mongkok Luxury Hotel, Fatuhada-Dili, Sábadu 25 Abril 2020. 

Ema hamutuk nain 11 sai husi kuarentena Mangkok Hotel Luxury Sábadu ohin. Foto Oe-Kusi Post/Marcelino Bata
Ema hamutuk nain 11 sai husi kuarentena Mangkok Hotel Luxury Sábadu ohin. Foto Oe-Kusi Post/Marcelino Bata. 

Entretantu, Sesta horseik, Koordenador Tarefa Serbisu ba Prevensaun no Mitigasaun COVID-19, dotór Sergio Lobo hatete, ema hamutuk nain 6 mak di’ak ona, maibé seidauk bele sai hodi ba hela ho sira nia familia sira, tanba sei dezinfekta sira nia sasan ne’ebé sira lori mak foin bele sai. Ema nain 6 ne’e, kompostu husi kazu provavél nain 4 ne’ebé di’ak tiha ona, no muda sai fali ona ba kuarentena sira iha Dili laran, no inklui nain rua seluk.

Total dadus Sábadu ohin hatudu, kazu suspeitu iha ema nain 392, sei iha ema nain 21 mak oras ne’e hein hela rezultadu teste laboratóriu, kazu provavél mamuk ona, iha ema nain 24 mak oras ne’e positivu kona moras virus corona (COVID-19), ema nain rua mak di’ak tiha ona, ema nain 347 mak rezultadu teste hatudu negativu, no iha kazu foun ida mak pessoal saúde ne’ebé durante ne’e fó asistensia médiku iha sentru izolamentu Vera Cruz no Hospital Nasionál Guido Valadares (HNGV) mós positivu ona kona COVID-19, maibé nia kondisaun saúde jeralmente hahu di’ak ona.

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE