PALABAN (TOP) - Prezidente Autoridade ba Rejiaun Administrativu Espesial Oe-Kusi Ambeno, José Luis Guterres “Lugu” katak atu hadi’ak liutan prosesu dezenvolvimentu iha rai-ketan ne’e, lider partidu politika sira iha Oe-Kusi Ambeno presija hamutuk hodi hametin estabilidade sosial, tanba tuir nia katak durante ne’e mosu hanoin diferente maka’as loos iha plata forma media sosial hanesan iha Facebook.
Eis Ministru Negósiu Estranjeiru no Kooperasaun (MNEK) ne’e husu ba partidu politika sira iha rai-ketan ne’e presija serbisu hamutuk hodi kria estabilidade sosial atu nune’e bele hadi’ak liutan prosesu dezenvolvimentu iha rai ki’ik ne’e.
Lugu, rekoñese progresu dezenvolvimentu iha Oe-Kusi Ambeno iha mudansa, maibé presija hadia di’ak liutan liuhusi entidade hotu tenke serbisu hamutuk hodi labele mosu konfrontativu iha media sosial.
“Alin sira buat balun di’ak ona, maibé buat balun mós sediauk di’ak. Misaun ami nian ne’e atu ajuda halo buat ne’eebé la di’ak atu hadi’ak, no sei iha kontaktu mós ho lider partidaria sira hanesan CNRT, PLP, KHUNTO, FRETILIN no sira seluk, ita atu kria estabilidade sosial,” Lugu esplika.
Nia komenta, problema ki’ik-boot mak fakar sai hotu iha Facebook ne’e sei la rezolve buat ida, no susar atu hetan fiar husi ema seluk.
“Ate ohin ha’u seidauk hasai ema ida tanba kartaun partidu politiku. Diretór barak iha ne’e seidauk hasai ema ida, so iha ida de’it, alin ida tanba nia lakohi kumpre regra Estadu emerjénsia, maibé ate agora hotu-hotu di’ak hela”.
“Ha’u husu de’it atu serbisu ho laran no fuan ba povu Oe-Kusi Ambeno, ha’u la husu lealdade ba partidu A ka B, husu lealdade imi nian ba rai lulik, rai doben Oe-Kusi Ambeno ida ne’e mak ha’u husu de’it ba bei-ala sira uluk ka’er ukun iha rai ne’e mak ha’u husu ba imi, la husu tan buat seluk,” Lugu haraik a’an.
