PALABAN (TOP) – Edifisiu Servisu Rejistu no Verifikasaun Emprezarial (SERVE) ne’ebé foin mak eziste iha Rejiaun Administrativu Espesial Oe-Kusi Ambeno (RAEOA) iha tinan 2017 liuba, oras ne’e nakfilak ba bibi luhan.
Prezidente Autoridade ba RAEOA, José Luis Guterres “Lugu” ne’ebé vizita edifisiu ne’e ba dala rua kedas, sente triste tebes ba kondisaun edifisiu ne’e, tanba kondisaun serbisu funsionáriu SERVE sira iha rai-ketan ne’e “hadau malu” de’it ho bibi sira. Nune’e, Lugu desidi hodi muda funsionáriu ba serbisu provizóriu iha rezidensia autoridade nian.
“Horseik ha’u, no ohin dader mós ha’u ba tan. Ha’u ba iha edifisiu SERVE nian bibi mak nakonu, fatin ne’e bibi mak hela fali iha ne’eba. Ha’u nia laran triste tebes, ha’u stress loos. Ha’u husu ohin dader ba fali husu ba alin sira favór ida imi mai serbisu iha Prezidente nia fatin,” hateten Lugu ba The Oe-Kusi Post hafoin partisipa iha enkontru estabelesimentu komisaun Covid-19 iha salaun Alfandega iha Palaban, Oe-Kusi Ambeno Tersa 12 Maiu 2020.
“Se ita atu atrai investor sira mai iha ita nia-rain kondisaun sira ne’e importante. Tanba se ita hakarak rai Oe-Kusi Ambeno hanesan investimentu SERVE ne’e para rejistu kompañia sira. Ne’ebé ita tenke hare sira ho di’ak ho edifisiu, kondisaun ne’ebé di’ak, se la’e ema mai hare bibi mak nakonu iha ne’eba, ha’u nia laran triste tebes,” Lugu afirma.
Tuir observasaun TOP nian, hafoin remata vizita ne’e, Lugu orienta kedas tékniku sira hadia urjente edifisiu ne’e, tanba ne’e fatin rejistu ba investor sira ho kompañia sira iha Oe-Kusi Ambeno.
