KUA-TETE (TOP) – Labarik orfonatu sira hamutuk nain 103 iha uma mahon Topu-Honis iha Kua-Tete (Kutet) ne’ebé abandonadu kuaje tinan ida, hetan ona vizita husi Prezidente Autoridade ba Rejiaun Administrativu Espesial Oe-Kusi Ambeno (RAEOA), José Luis Guterres Lugu hodi hare sira nia kondisaun real molok desidi atu fó tulun ruma.
Eis Padre Amerikanu, Richard Dasbach, SVD hahu tama iha Oe-Kusi Ambeno iha tinan 1972, no hahu funda uma mahon Topu-Honis iha tinan 1993 ho objetivu atu tulun oan ki’ak sira husi suku 18 iha Oe-Kusi Ambeno. Rezultadu husi uma mahon ne’e konsege produz ona fini di’ak lubuk ida ne’ebé serbisu iha administrasaun públiku Timor-Leste hanesan balun oras ne’e servi nu’udar forsa armada ho diviza boot ona, balun sai emprezariu susesu, no Ambeno oan kuaje nain hitu (7) oras ne’e eskola hela iha universidade balun iha Estadu Unidus Amerika no besik atu gradua ona. Ambeno oan nain 7 ne’e hahu tama eskola primaria to’o ensinu superior iha Amerika hotu.
Maske nune’e, eis Padre ne’e ikus mai hetan alegasaun katak deskonfia involve iha kazu abuzu sexual hasoru labarik oan ki’ak sira, no Tribunal Distrital Dili foti ona desijaun tama tiha Padre ne’e ba prijaun preventiva iha Bekora to’o ohin loron.
Prezidente Autoridade ba RAEOA, Lugu katak nia prezensa iha uma mahon Topu-Honis atu observa no rona direita difikuldade sira ne’ebé oan kiak sira hasoru molok hare kondisaun balun hodi fó tulun.
“Ohin mai vizita ita nia bei-oan sira ne’ebé hela iha orfonatu Topu-Honis, amu mak halibur sira kleur ona, no mós inan faluk sira ne’ebé hamutuk atu hare orfanatu sira ne’ebé hela ne’e,” hatete Prezidente Lugu ba The Oe-Kusi Post (TOP) iha Kua-Tete, Oe-Kusi Ambeno, Tersa 12 Maiu 2020.
“Objetivu mai hare sira atu saida loos mak sira presiza para ita bele fó ajuda konforme posibilidade, administrasaun rai Oe-Kusi Ambeno nian ne’ebé hakark koopera fó ajuda para obra ne’ebé amu lulik hala’o kleur ona ita bele ajuda kontinuidade,” afirma Lugu.
Observasaun The Oe-Kusi Post (TOP) iha vizita ne’e, hafoin remata dadalia ho ona ki’ak sira, Lugu konvida labarik orfonatu sira, inklui responsabel iha Topu-Honis kontinua hala’o vizita iha kampaun laran hodi hare diretamente ba igreja, kampu desportivu, eskola, inklui sala toba no fatin tein nian.
“Ha’u hare alin sira, bei-oan sira ne’e saúde di’ak hakarak mós obra ne’e sarani nian bele kontinua ba oin. Ami prontu atu fó ajuda ba iha orfonatu ida ne’e, foin dadauk ajuda ona ai-han iha orfonatu Mahata, no ohin mai to’o Kua-Tete atu hare tan ida ne’e,” promete Lugu.
Iha sorin seluk koordenador Topu-Honis, Liliana Tarung agradese ba vizita ne’e no fó esperansa tomak ba autoridade foun hodi tau matan ba sira.
KLARIFIKASAUN:
The Oe-Kusi Post hasai fali imajen oan ki'ak sira husi Topu-Honis iha notisia ne'e nia laran, tanba liga ba kazu ne'ebé antes ne'e akontese ona. Ba fallansu ida ne'e, redasaun husu deskulpa.
