Oekusipost.com Ambeno – Unidade Polisia Tranzitu iha Rejiaun Administrativu Espesial Oe-Kusi Ambeno (RAEOA) durante fulan Marsu nia laran konsege hatama ona osan hamutuk $1087 ba kofre Estadu.
Komandante polisia tranzitu Oe-Kusi Ambeno, Inspetór Samuel Leki katak, osan sira ne’e mai husi rezultadu prende motorizada sira ne’ebé kontra regra sira, no infrasaun seluk tan.
“Relatóriu ba fulan Marsu nian mak hanesan iha infrasaun 5 ho total osan ne’ebé selu mak $1087,” hateten Inspetór Leki ba Oe-Kusi Post iha Oe-Kusi Ambeno foin lalais.
Nia hatutan, motorizada hamutuk 28 mak oras ne’e nain sira seidauk mai atu rezolve hanesan prosesa sira nia dokumentu sira, no nia husu nafatin ba nain sira atu trata lalais dokumentu sira hodi bele ba foti sira nia sasan.
“Ami mós hein hela ida ne’e atu prosesa lalais motorizada ne’ebé sei rai iha kuartel ho nia total 28 inklui kareta ida. Espara sasan nain sir abele trata lalais sira nia dokmentu sira hodi mai foti sira nia sasan,” nia esplika.
Nia konta, durante periodu Estadu emerjénsia to’o oras ne’e seidauk rejista insidente boot ruma, no atividade polisia unidade tranzitu nian mós la’o hanesan baibain.
