Oekusipost.com Ambeno – Folin nesesidade báziku sira iha Rejiaun Administrativu Espesial Oe-Kusi Ambeno (RAEOA) hahu karun ona, tanba impaktu husi implementasaun Estadu emerjénsia ne’ebé hahu desde loron Sesta 28 Marsu 2020 to’o ohin loron.
The Oe-Kusi Post detekta, maske nesesidade báziku sira hanesan foos, masin-midar, kafé no seluk tan sei sufisiente hela hodi atende komprador sira durante tempu Estadu emerjénsia, maibé iha pessoal balun hahu aproveita situasaun ne’e hodi hasa’e folin. Sasan sira ne’ebé oras ne’e nia folin to’o kesi kakorok mak hanesan kombustivel, liliu gazoliña masa aqua boot nakonu ho folin $1.50, oras ne’e sa’e ba $3.50, no masa aqua boot nanotak ho folin $1.25 oras ne’e sa’e ba $1.75.
Situasaun ne’e halo makfaan sira no maksosan sira deskuti malu tihan, tanba folin kombustivel kontinua sa’e iha tempu difisil ne’e, no situasaun ne’e fó impaktu ba transporte públiku no privadu sira espesialmente ba ekipa prevensaun CVID-19 no seluk tan.
Kona-bá situasaun ne’e, negosiante ambulante Pedro Lelan husu ba autoridade RAEOA atu buka solusaun ba problema ne’e.
“Tuir loloos governu mak buka buka dalan kona-ba kombustivel se la mai husi Dili karik autoridade buka dalan bele simu husi fronteira tuir odamatan,” hateten Pedro Lelan ba Oe-Kusi Post iha Padimaun, Oe-Kusi Ambeno, Segunda 13 Abril 2020.
“Aqua agora nakonu ho folin $3.50, nanotak $1.75, ida ne’e sa’e ba loron 3 ona, antes ba sei iha $2.50 centavos, maibé agora sa’e tan ona ba $3.50 centavos,” nia esplika.
Iha fatin hanesan, motorista Zinho Maniquin Cofan sente triste itoan ho folin nesesidade báziku sira liliu kombustivel oras ne’e sa’e maka’as iha rai ketan (enklave).
“Ha’u hanesan motorista sente triste itoan, agora dadauk ita hakarak aplika Estadu emerjénsia maibé husu ba governu atu kria kondisaun atu nune’e labele fó impaktu mai ami hanesan motorista,” hatete Cofan.
Hatan ba kestaun ne’e, Xefe Gabinete Interinu Prezidente Autoridade ba RAEOA, Agustinho Caet katak, autoridade iha responsabilidade ba EDTL hodi kontinua fornese enerjia eletrisidade ba povu sira iha rai-ketan ne’e, no promete sei buka solusaun ba kestaun folin kombustivel no nesesidade báziku sira oras ne’e sa’e dadauk ona.
