Oekusipost.com Ambeno – Rejiaun Administrativu Espesial Oe-Kusi Ambeno (RAEOA) to’o oras ne’e seidauk rezista sintomas ba moras virus corona (COVID-19).
Mosu informasaun balun espalla iha nasionál katak deskonfia Oe-Kusi Ambeno mós rezista ona kazu suspeita balun, maibé portavóz sentru integradu ba jestaun krize, dotora Odete Viegas katak to’o oras ne’e nia seidauk simu konfirmasaun ruma kona-bá assuntu ne’e, maibé rekoñese katak ema ne’e agora sei iha hela Kefamenanu.
“Sobre Oe-Kusi nian loos, maibé ema ne’e sei iha hela Kefa. Seidauk mai to’o Oe-Kusi, maibé ekipa ambulansia no ekipa laboratóriu prepara ona atu ba foti sample. Karik ne’e mak horseik ema ne’e iha Oe-Kusi ona, loloos horseik kedas aviaun MAF ne’e ba, maibé seidauk, entaun ita hein,” hatete dotora Odete liu husi konferensia ba imprensa iha Sentru Konvensaun Dili, Segunda 13 Abril 2020.
Iha parte seluk, diretór interinu RAEOA, Marcos Seo mós justifika katak, to’o oras ne’e seridauk rezista sintomas ruma ba ema sira ne’ebé oras ne’e kumpri hela loron 14 iha sentru akollimentu sira iha Oe-Kusi Ambeno.
"La’e seidauk, ha’u hanesan prezidenti prevensaun COVID-19 iha Oe-Kusi Ambeno la iha sidadaun ruma hatudu sintomas," hateten diretór Seo via kontaktu telemovél ba Oe-Kusi Post, Segunda 11 Abril 2020.
