DILI (TOP) - Relatóriu Trimestrál Fundu Mina-Rai Timor-Leste nian husi Banco Central Timor-Leste (BCTL) fó sai katak, balansu Fundu Petrolíferu sa’e, pur-volta milaun US$ 122,6 mak provoka balansu osan mina-rai ne’e aumenta husi bilaun $18,31 iha Trimestre dahuluk sa’e ba bilaun $18,43 iha Trimestre daruak nian.
Lei Fundu Mina-Rai estipula katak Ministériu Finansas maka estabelese estratéjia investimentu no Banco Central de Timor-Leste (BCTL) mak halo jestaun operasional ba investimentu.
Nune’e, BCTL lansa Relatóriu Trimestrál Fundu Mina-Rai Timor-Leste nian ba trimestre daruak 2026 ne’ebe termina iha loron 30 fulan Juñu. Relatóriu ne’e hatudu katak kapitál/Balansu Fundu Mina-Rai nian iha trimestre ne’e maka billiaun $18,43, kompara ho billiaun $18,31 iha trimestre dahuluk 2026 nian.
Relatóriu ne’e mós hatudu katak total reseitas ne’ebe simu iha trimestre ne’e hamutuk tokon $9,62 no rendimentu brutu husi investimentu hamutuk tokon $719,09, ne’ebé kompostu husi tokon $141,48 husi juros/kupon no dividendu simu, no tokon $577,61 husi mudansa iha valór merkadu. Ho nune’e, retornu Fundu Mina-Rai durante trimestre ida ne’e husi merkadu finanseiru mak 4,05%, kompara ho ninia referensia 3,99%.
Iha trimestre ida ne’e, total osan ne’ebe dada/sai husi Fundu Mina-Rai hamutuk tokon $603,80, ne’ebe tokon $600 transfere ba Konta Tezouru atu finansia Orsamentu Estadu no tokon $3,80 hodi selu kustu jestaun investimentu.
Ho nune’e, desde estabelesimentu Fundu Mina-Rai, total reseitas aproximadamente billiaun $25,30, total retornu husi investimentu iha merkadu finanseiru hamutuk billiaun $12,65 ho média retornu anual 4,72%, no total levantamentu hodi finansia Orsamentu Estadu hamutuk billiaun $19,66.
Relatóriu trimestrál, lei Fundu Mina-Rai nian nomós Akordu Jestaun Operasionál, disponivel iha portal Banku Central de Timor-Leste nian.
Iha parte seluk, relatóriu husi Ministériu Finansas relata katak, mudansa iha balansu Fundu Petrolíferu mai husi:
* Rendimentu investimentu ( milaun US$ 712).
* Reseitas petrolíferas ( milaun US$ 9.6) no
* Tranferênsia ba Orsamentu Estadu ( milaun US$ 600).
Hahú husi Janeiru to’o Juñu 2026:
* Total rendimentu husi investimentu Fundu Petrolífero hamutuk milaun US$ 610
* Reseitas petrolíferas milaun US$ 18 no;
* Transferênsia ba OJE hamutuk milaun US$ 800.
Fundu Petrolíferu fó retornu investimentu 3,98% in Trimestre II, rekupera fali husi monu 0,55% iha Trimestre I. Retornu investimentu husi Janeiru to’o Juñu 2026 hamutuk 3,41%.
Investimentu iha Merkadu Finanseiru fó retornu 4,05% iha Trimestre II. Karteira Kresimentu fó retornu 4,99% iha Trimestre II, impulsiona husi retornu husi asoens hamutuk 13,79%. Rendimentu Fixu iha Karteira Kresimentu fó retornu 0,44%, enkuantu Karteira Likidez fó retornu 0,55%.
Merkadu asoens rekupera fali iha Trimestre II, hafoin volatilidade relasiona ho konflitu iha Médiu-Oriente no folin mina-rai ne’ebé sa’e maka’as iha Trimestre I. Ho tensaun konflitu nebe’e tu’un no folin mina-rai ne’ebé tu’un mós hamenus merkadu ninia preokupasaun konaba inflasaun no melhoria investor sira ninia sentimentu. Rendimentu husi empreza sira ne’ebé kontinua forte no optimizmu konaba intelejénsia artifisial fó mós impulsu ba asoens globais.
Dezenpeñu iha mandatu rendimentu fixu kahur. Ho rendimentu Tezouru EUA ne’ebé sa’e tamba inflasaun ne’ebé kontinua a’as, halo índises referénsias ba Títulus Tezouru EUA 3-5 anos no 5-10 anos fó retornu besik zero. Enkuantu Tezouros globais la’aos EUA no TIPS fó retornu pozitivu.
Dólar EUA apresia iha meadu 2026, ho Índise DXY apresia 2,9%.
