DILI (TOP) — Akontesimentu ai-monu baku mate tiha ona sidadaun feto ida ho naran Octaviana de Jesus Noronha iha Aldeia Lesibuta, suku Manleu, Postu Administrativu Dom-Aleixo, Munisipiu Dili.
Matebian, Octaviana de Jesus Noronha foin halo tinan 11 nu’udar mós estudante klase V iha eskola Primaria Beduku, Comoro.
Estadu lakon tan jerasaun foun ida ona, no familia sira liliu inan-aman sira oras ne’e sira nia fuan-laran kanek todan basa tenke lakon ona sira nia oan-doben ba uluk ona mundu seluk. Hahu ohin ba oin, familia sira sei lahetan tan ona Octaviana iha mundu ida ne’e. Kriasaun tomak ne’ebé eziste iha mundu rai-klaran la’os rohan la’ek, maibé ida-idak sei fila ba fatin ne’ebé promete nanis ona molok tempu hahu.
Tuir sasin Natalino Soares Madeira deklara, iha labarik sira nain 4 kompostu hosi mane tolu, no feto ida maka ba hili-ai iha tuku 1o dadersan, no oras besik tuku 12 meudia ohin derepente akontese insidente ai-monu hodi halakon tiha kedas Octaviana nia moris.
“Ami ba hili ai. Ha’u maka tesi ai ne’e. Ha’u maka tesi ai ne’e, ha’u tesi seidauk hotu tiba-tiba ai ne’e namdoras monu tun baku ami na’in tolu hotu kedan, baku uluk maka ha’u, depois ikus maka tuir fali nia depois maka nia monu tun baku nia ulun monu ba fatuk ne’e,” hateten Natalino Soares Madeira nu’udar aman kiik, ba jornalista sira iha sira nia rejidensia aldeia Lesibuta, suku Manleu, Dili, Kuarta 08 Dezembru 2021.
“Ohin dadersan abin maka haruka ami ba hili ai, tanba iha uma ai laiha ne’ebé hau dehan depois maka ami ba hili ai, hau dehan ba Octaviana de Jesus Noronha, o keta ba ida maibé nia dehan ha’u nia laran kaman atu bele ba tuir imi, hein depois maka ita ba entaun ne’e maka nain 4 ba,” nia konta.
Matebian nia aman kiik ne’e konta, Ai ne’e, monu kona iha nia parte ibun depois monu maka baku nia ulun iha fatuk, familia konsege lori ba iha sentru saude komoro depois maka lori fali mai ne’e.
“Ami ba hili ai seidauk udan nia monu lori tun mai maka akontese udan boot nia kondisaun mate maka ami kous nia ran tun mai faru sira ne’e bokon hotu,” nia hateten.
Nia konta dadersan sira ba hili ai nia apa la hatene ida, tanba nia ba servisu derepennte ai monu ne’e, sira hakilar maka nia apa halai sa’e ba nia apa servisu serbisu iha pertamina manleu besik mota ibun.
“Ohin ami ba hili ai nia ama maka haruka sira ba hili ai,” nia dehan.
Matebian Octaviana de Jesus Noronha ne’e, aman hosi José Almeida de Jesus no inan Luciana Noronha matebian hela iha aldeia Lesibuta Suku Manleu, Munisipiu Dili.
Entretantu José Almeida de Jesus oan husi matebian Octaviana de Jesus Noronha sente triste moris mai kondisaun di’ak hela, maibé to’o tiha idade 11 maka mate derepente de’it.
“Ha’u sente triste tebes, nia moris mai kondisaun di’ak hela maibé ida ne’e laiha to’o idade 11 ona maka atu ba 12 ne’e mate ne’e nia lakon boot,” nia aman hateten ho matan ben turuk.
Hafoin akontesimentu ne’e, parte governu liu husi Sekretariu Estadu ba Protesaun Sivil (SEPS), Joaquim José Gusmão dos Reis Martins ho ekipa to’o kedas iha fatin akontesimentu hodi rekolla informasaun kona-ba Octaviana de Jesus Noronha nia mate ne’e.
Sekretariu Estadu Protesaun Sivil ne’e dehan, tanba deit nesesidade maka sira ba hili ai depois ida maka insidente ne’e baku mate alin Octaviana de Jesus Noronha mate.
Nia dehan, nia nafatin alerta ba komunidade sira hodi bele atensaun ohin no aban ba too tinan oin fenomena laliña sei akontese udan boot.
“Ita husu ba situasaun sira hanesan ita kalma mantein iha uma ita haree kuandu presiza maka ita sai no mós labele ba iha fatin risku sira ezemplu hanesan iha ne’e besik mota maibé husik ba sasan lakon laiha problema ita nia vida ne’e konta ita la sosa,” nia informa.
Nia dehan, normalmente kuandu akontese hanesan ne’e SEPS apoiu kedas hahan no mos osan balun, lona no sasan sira ne’ebé maka iha ne’e SEPS apoiu kedas bee mai iha familia tanba ne’e politika durante ne’e akontese SEPS iha, mai fokus apoiu.
