DILI (TOP) — Ministru Transporte no Komunikasaun, José Agustinho hateten, total orsamentu ba manutensaun Ro-ahi Nakroma besik rihun $ 600.
“Montenta orsamentu ba manutensaun pur volta rihun $500 resin, besik rihun $600, importante ro ne’e nia kondisaun di’ak, hala’o operasaun ona,” hatetn Ministru José Agustinho ba jornalista sira iha Palásiu Governu, Dili Segunda 10 Agustu 2020.
Governante mai husi partidu KHUNTO ne’e katak, ro Berlin Nakroma foin lalais hasoru difikuldade itoan iha parte odamatan nian, maibé hadia hotu ona
“Agora ro ahi rua ne’e halo movimentu hotu ona transporte maritima agora normal ba Oe-Kusi Ambeno no Atauru,” nia esplika.
Kona-ba kestaun ne’e, Eis Prezidente Repúblika, José Ramos Horta lamenta tebes ho prosesu manutensaun ba ro ne’e konsege gasta osan hamutuk rihun $40 kada fulan hodi ba empreza Indonézia ida mak halo jestaun desde tinan 2007. Nune’e, iha tinan 2007, Estadu gasta ona osan barak.
“KAK tenke halo investigasaun, Estadu TL fakar kada fulan $40 mil selu kompañia Indonézia atu halo jestaun Nakroma hahu iha 2007,” hateten Horta ne’ebé The Oe-Kusi Post asesu iha nia pájina ofisial Facebook José Ramos Horta.
“Hahu iha 2007 kada tinan, Estadu TL selu $800 mill atu halo de’it “manutensaun” (manutensaun bosok) iha Surabaia,” afirma Horta.
Horta mós kestiona, tanba saida mak durante tinan 15 ona, seidauk iha pilotu ka’er ro ahi oan ida hanesan Nakroma?
Horta dehan, China durante ne’e forma ona pilotu F-FDTL ka’er ro ahi kombate la to’o tinan ida.
“KAK tenke halo duni investigasaun klean iha jestaun Nakroma no problema lubuk ida iha Transporte no Komunikasaun,” Horta sujere KAK tenke loke ona prosesu investigasaun.
Ministru José Agustinho rekoñese katak, foin iha tinan kotuk mak nia haruka direitor Autoridade Portuariu Dili (APORTIL) loke konkursu públiku ida kona-ba jestaun ro ahi Nakroma.
“Ha’u hanoin, iha ha’u nia mandatu foin tinan kotuk, durante iha kompañia ida ne’ebé mak nia responsavel ba halo manutensaun, iha tinan kotuk bainhira ro ne’e ba ha’u orienta prezidente APORTIL oinsa mak loke konkursu para ita bele hetan kompañia ida ne’ebé mak iha duni kapasidade para nia halo manutensaun ba ro ne’e,” dehan ministru.
Nia konta, iha tempu ne’ebá hetan duni kompañia ida ne’ebé mak hetan katak sira ho atendimentu ne’ebé mak di’ak iha nasaun Indonezia Surabaya.
“Ro ne’e tempu ba ita bele dehan hadia parte hotu komponente vital ba ro no makina sira ne’e hadia diak hotu. Rekursu umanu sasan ita nian mas ema ne’ebé mak opera ita nia maluk sira husi nasaun Indonézia ne’ebé mak iha kapasidade tekniku, maibé oinsa mak ita investe para bainhira ita iha lojístika, iha ro-ahi ita rasik sei opera ita nian,” katak nia.
